raqqasa-e-auham

asnām-e-imārat kā parastār hai aalam

sarmāya-e-ġhaflat kā ḳharīdār hai aalam

kaTtī haiñ sadā sidq maqāloñ kī zabāneñ

haq-go ke liye arsa-gah-e-dār hai aalam

darvesh-e-ḳhudā nān-e-shabīna ko hai muhtāj

go ne.amat-o-ikrām kā bāzār hai aalam

shādāb hai din-rāt ġharīboñ ke lahū se

arbāb-e-zar-o-sīm kā gulzār hai aalam

ḳhud zāhid-e-sad-sāla giraftār hai jis meñ

vo halqa-e-tazvīr-o-fusūñ-zār hai aalam

har gaam pe hai sho.abada-e-nafs kā phandā

raqqāsa-e-auhām kā darbār hai aalam

dil ḳhizr kā hai naġhma-e-be-mānī pe raqsāñ

tahzīb ke pāzeb kā jhankār hai aalam

is qahba-e-bāzārī se rakho na tavaqqo

ehsān farāmosh-o-ziyāñ-kār hai aalam

sar rakhtā hai āvāra-mizājoñ ke qadam par

ye haq meñ vafādāroñ ke talvār hai aalam

shā.ir ke nahīñ siine meñ gunjā.ish-e-takiya

maanā ki bahut dilkash-o-purkār hai aalam

is ahd-e-pur-āshob meñ 'bebāk' na pūchho

kis darja jafā-kash-o-sitam-gār hai aalam

asnam-e-imarat ka parastar hai aalam

sarmaya-e-ghaflat ka KHaridar hai aalam

kaTti hain sada sidq maqalon ki zabanen

haq-go ke liye arsa-gah-e-dar hai aalam

darwesh-e-KHuda nan-e-shabina ko hai muhtaj

go neamat-o-ikram ka bazar hai aalam

shadab hai din-raat gharibon ke lahu se

arbab-e-zar-o-sim ka gulzar hai aalam

KHud zahid-e-sad-sala giraftar hai jis mein

wo halqa-e-tazwir-o-fusun-zar hai aalam

har gam pe hai shoabada-e-nafs ka phanda

raqqasa-e-auham ka darbar hai aalam

dil KHizr ka hai naghma-e-be-mani pe raqsan

tahzib ke pazeb ka jhankar hai aalam

is qahba-e-bazari se rakho na tawaqqo

ehsan faramosh-o-ziyan-kar hai aalam

sar rakhta hai aawara-mizajon ke qadam par

ye haq mein wafadaron ke talwar hai aalam

shair ke nahin sine mein gunjaish-e-takiya

mana ki bahut dilkash-o-purkar hai aalam

is ahd-e-pur-ashob mein 'bebak' na puchho

kis darja jafa-kash-o-sitam-gar hai aalam