raqs-e-bismil

chāñd meñ jo ThanDak hai

mehr meñ jo garmī hai

jo havā meñ narmī hai

kahkashāñ chamaktī hai

duur āsmānoñ meñ

kitnī bastiyāñ hoñgī

ajnabī jahānoñ meñ

aadmī to zarra hai

balki is se kamtar hai

tere bas meñ sūraj hai

aur haiñ samundar bhī

jis qadar bhī paanī hai

terī mehrbānī hai

har kiran ujāle kī

ye zamīn bhī terī

āsmān bhī terā

lā-makān bhī terā

aur makān bhī terā hai

tū hī sab kā mālik hai

terī mehrbānī hai

tere hukm ke taabe

phuul ho ki ḳhushbū ho

jannat ho ki dozaḳh ho

donoñ tere bande haiñ

zulm karne vaale bhī

zulm sahne vaale bhī

zulm karne vāloñ ko

kyoñ sazā nahīñ miltī

rizq sab ko miltā hai

ek hai ġhanī in meñ

dūsrā bhikārī hai

zālimoñ kī mahfil meñ

ab bhī raqs-e-bismil hai

terī hukmrānī meñ

zulm ab bhī jaarī hai

ismateñ kyoñ luTtī haiñ

in siyāh rātoñ meñ

tū hai qādir-e-mutlaq

zulm karne vāloñ se

ehtisāb kab hogā

har lahū ke qatre kā

yaañ hisāb kab hogā

inqalāb kab hogā

zulm sahne vāloñ ko

hukm de baġhāvat kā

zulm karne vāloñ kī

gardaneñ uḌā Dāleñ

haath jo uTheñ un par

un ko kaaT kar rakh deñ

pand aur nasā.eh se

zulm ruk nahīñ saktā

sirf ek rastā hai

zulm karne vāloñ ke

haath hī qalam kar do

chand mein jo ThanDak hai

mehr mein jo garmi hai

jo hawa mein narmi hai

kahkashan chamakti hai

dur aasmanon mein

kitni bastiyan hongi

ajnabi jahanon mein

aadmi to zarra hai

balki is se kamtar hai

tere bas mein suraj hai

aur hain samundar bhi

jis qadar bhi pani hai

teri mehrbani hai

har kiran ujale ki

ye zamin bhi teri

aasman bhi tera

la-makan bhi tera

aur makan bhi tera hai

tu hi sab ka malik hai

teri mehrbani hai

tere hukm ke tabe

phul ho ki KHushbu ho

jannat ho ki dozaKH ho

donon tere bande hain

zulm karne wale bhi

zulm sahne wale bhi

zulm karne walon ko

kyon saza nahin milti

rizq sab ko milta hai

ek hai ghani in mein

dusra bhikari hai

zalimon ki mahfil mein

ab bhi raqs-e-bismil hai

teri hukmrani mein

zulm ab bhi jari hai

ismaten kyon luTti hain

in siyah raaton mein

tu hai qadir-e-mutlaq

zulm karne walon se

ehtisab kab hoga

har lahu ke qatre ka

yan hisab kab hoga

inqalab kab hoga

zulm sahne walon ko

hukm de baghawat ka

zulm karne walon ki

gardanen uDa Dalen

hath jo uThen un par

un ko kaT kar rakh den

pand aur nasaeh se

zulm ruk nahin sakta

sirf ek rasta hai

zulm karne walon ke

hath hi qalam kar do