rasm-e-ijra

tire karam kā karūñ shukr kis tarah se adā

mirī umiid ko tū ne yaqīñ meñ badlā hai

tire qadam se jo pur-nūr ho ga.ī mahfil

sabhī ne sochā kī dhartī pe chāñd utrā hai

tire na hone se yaañ kā 'ajīb manzar thā

gumāñ guzartā ki mahfil hai soz-ḳhvānī kī

baḌhe qadam jo tire merī bazm kī jānib

fazā meñ phail ga.ī itr shādmānī kī

tire raqīb kī ta.ana-zanī ke Dar se sanam

pareshāñ-hāl thā dil aur be-qarār bhī thā

mujhe yaqīn thā aaogī toḌ kar bandhan

terī vafāoñ pe is darja e'tibār bhī thā

mujhe hai faḳhr tire faisle pe jān-e-jigar

ki tū ne merī mohabbat kī laaj rakkhī hai

zamāne-bhar ke rivājoñ ko toḌ kar tū ne

jahāñ meñ 'ishq-o-sadāqat kī laaj rakkhī hai

bas ek baar tujhe dekhne kī ḳhvāhish thī

ye rasm-e-ijrā kī mahfil to ik bahāna thā

agar tū aatā nahīñ yaar merī mahfil meñ

mujhe kitāb ke har lafz ko jalānā thā

tere karam ka karun shukr kis tarah se ada

meri umid ko tu ne yaqin mein badla hai

tere qadam se jo pur-nur ho gai mahfil

sabhi ne socha ki dharti pe chand utra hai

tere na hone se yan ka 'ajib manzar tha

guman guzarta ki mahfil hai soz-KHwani ki

baDhe qadam jo tere meri bazm ki jaanib

faza mein phail gai itr shadmani ki

tere raqib ki tana-zani ke Dar se sanam

pareshan-haal tha dil aur be-qarar bhi tha

mujhe yaqin tha aaogi toD kar bandhan

teri wafaon pe is darja e'tibar bhi tha

mujhe hai faKHr tere faisle pe jaan-e-jigar

ki tu ne meri mohabbat ki laj rakkhi hai

zamane-bhar ke riwajon ko toD kar tu ne

jahan mein 'ishq-o-sadaqat ki laj rakkhi hai

bas ek bar tujhe dekhne ki KHwahish thi

ye rasm-e-ijra ki mahfil to ek bahana tha

agar tu aata nahin yar meri mahfil mein

mujhe kitab ke har lafz ko jalana tha