raushni ka charagh

kitne parvāne jaan dene ko

gir rahe haiñ ḳhamosh sham.oñ par

sard rātoñ meñ zabt-e-girya se

ashk aa aa ga.e haiñ palkoñ par

ujḌā ujḌā sā ye jo kamra hai

koī kursī na koī mez yahāñ

copiyāñ parche aur kitābeñ sab

in ko dīmak se maiñ bachā.ūñ kahāñ

ek saal aur rah gayā hai ab

ḳhatm ho jā.egī mirī ta.alīm

ḳhaak jab dar-ba-dar kī chhānūñgā

kar sakūñgā na ziist kī tāzīm

bhaa.ī bahnoñ ko ḳharch denā hai

un se va.ada bhī kar nahīñ saktā

ādamiyyat kā paas hai varna

zahr khā kar maiñ aaj so rahtā

aaj phir diq ne merī baajī ko

jā ke pardes meñ daboch liyā

kal jo pinDī se us kā ḳhat aaya

merā siina kisī ne noch liyā

baT gayā mulk ho ga.e taqsīm

ham-nafas aur mohabbatoñ ke amiin

kyā isī fasl-e-gul kā saudā thā

ḳhaak aur ḳhuuñ ugal rahī haiñ ruteñ

ek dil thā jo haat se koī

le uḌā ik nigāh ke badle

vāh-vā ho ga.ī jahāñ bhar meñ

kyā milā mujh ko aah ke badle

dukh ke ehsās ke tale dab kar

TuuT jaa.e na aaj merī lai

kyoñ na har ġham ko rāz-dān karūñ

merā fan hī to merī duniyā hai

fan se goyā panāh miltī hai

varna ġham kā abhī ilaaj kahāñ

jis se dil bāġh-bāġh ho jaa.e

us mohabbat kā hai rivāj kahāñ

kitnī vīrān raat hai lekin

phailtī jā rahī hai bū-e-vafā

phir koī sochtā hai zulmat meñ

raushnī kā charāġh gul na huā

kitne parwane jaan dene ko

gir rahe hain KHamosh shamon par

sard raaton mein zabt-e-girya se

ashk aa aa gae hain palkon par

ujDa ujDa sa ye jo kamra hai

koi kursi na koi mez yahan

copiyan parche aur kitaben sab

in ko dimak se main bachaun kahan

ek sal aur rah gaya hai ab

KHatm ho jaegi meri talim

KHak jab dar-ba-dar ki chhanunga

kar sakunga na zist ki tazim

bhai bahnon ko KHarch dena hai

un se wada bhi kar nahin sakta

aadamiyyat ka pas hai warna

zahr kha kar main aaj so rahta

aaj phir diq ne meri baji ko

ja ke pardes mein daboch liya

kal jo pinDi se us ka KHat aaya

mera sina kisi ne noch liya

baT gaya mulk ho gae taqsim

ham-nafas aur mohabbaton ke amin

kya isi fasl-e-gul ka sauda tha

KHak aur KHun ugal rahi hain ruten

ek dil tha jo hat se koi

le uDa ek nigah ke badle

wah-wa ho gai jahan bhar mein

kya mila mujh ko aah ke badle

dukh ke ehsas ke tale dab kar

TuT jae na aaj meri lai

kyon na har gham ko raaz-dan karun

mera fan hi to meri duniya hai

fan se goya panah milti hai

warna gham ka abhi ilaj kahan

jis se dil bagh-bagh ho jae

us mohabbat ka hai riwaj kahan

kitni viran raat hai lekin

phailti ja rahi hai bu-e-wafa

phir koi sochta hai zulmat mein

raushni ka charagh gul na hua