raushni ki saughat

maiñ alfāz kā tohfa kāġhaz meñ lapeT kar laayā thā ki tumheñ nazr karūñgā

vo rāste hī meñ bikhar gayā

is meñ merā qusūr nahīñ

ye to havā kī sharārat thī

maiñ jo kuchh kahnā chāhtā huuñ use kāġhaz par raushnā.ī banā kar bikher detā huuñ

mere ḳhayālāt kāġhazī haiñ

mere alfāz kāġhazī haiñ

merā vajūd kāġhazī hai

maiñ ne kal shaam chaa.e kī chuskī lete hue sochā thā

ki tum agar mere kāġhazī ghar ko jalā do to kyā hī achchhā ho

lekin tumhārī āñkheñ to ye kahtī haiñ

ki vo apnī raushnī se mere dīvār-o-dar sajā.eñgī

merī rātoñ ko jagmagā.eñgī

merī nīñdoñ par ḳhvāb ban kar chhā jā.eñgī

lekin mujhe is par yaqīn nahīñ aatā

kyūñki abhī tak tum ne apnī āñkhoñ kī ḳhvāhish ko

alfāz kā jaama nahīñ pahnāyā

maiñ to jo kuchh bhī kahnā chāhtā huuñ kāġhaz par bikher detā huuñ

tumhāre jism meñ havā sansanātī hai

aur tum havā kī tarah narm-o-nāzuk ho

mere jism meñ bhī havā sansanātī hai

lekin vo merī tarah bīmār aur kamzor nahīñ

havā mujh se aksar mere tohfe chhīn letī hai

maiñ kal phir alfāz kā tohfa kāġhaz meñ lapeT kar lā.ūñgā

lekin mujhe yaqīn hai

ki havā ye tohfa rāste hī meñ chhīn legī

havā hamārī dushman nahīñ

ye to ham donoñ kā sahārā hai

ye tumheñ zindagī detī hai

aur mujhe zinda rahne kī hasrat

ye apne dāman meñ na jaane kitnī chīzeñ chhupā.e hue hai

mere aur tumhāre ḳhāndān kī nāmūs

merī aur tumhārī bātoñ kī afvāheñ

jab havā bahut hī udaas ho to tum mere paas aanā

maiñ tumhārī baḌī baḌī āñkhoñ meñ

apnī ruuh kī raushnī bhar dūñgā

lekin us vaqt tak maiñ būḌhā ho chukā hūñgā

main alfaz ka tohfa kaghaz mein lapeT kar laya tha ki tumhein nazr karunga

wo raste hi mein bikhar gaya

is mein mera qusur nahin

ye to hawa ki shararat thi

main jo kuchh kahna chahta hun use kaghaz par raushnai bana kar bikher deta hun

mere KHayalat kaghazi hain

mere alfaz kaghazi hain

mera wajud kaghazi hai

main ne kal sham chae ki chuski lete hue socha tha

ki tum agar mere kaghazi ghar ko jala do to kya hi achchha ho

lekin tumhaari aankhen to ye kahti hain

ki wo apni raushni se mere diwar-o-dar sajaengi

meri raaton ko jagmagaengi

meri nindon par KHwab ban kar chha jaengi

lekin mujhe is par yaqin nahin aata

kyunki abhi tak tum ne apni aankhon ki KHwahish ko

alfaz ka jama nahin pahnaya

main to jo kuchh bhi kahna chahta hun kaghaz par bikher deta hun

tumhaare jism mein hawa sansanati hai

aur tum hawa ki tarah narm-o-nazuk ho

mere jism mein bhi hawa sansanati hai

lekin wo meri tarah bimar aur kamzor nahin

hawa mujh se aksar mere tohfe chhin leti hai

main kal phir alfaz ka tohfa kaghaz mein lapeT kar launga

lekin mujhe yaqin hai

ki hawa ye tohfa raste hi mein chhin legi

hawa hamari dushman nahin

ye to hum donon ka sahaara hai

ye tumhein zindagi deti hai

aur mujhe zinda rahne ki hasrat

ye apne daman mein na jaane kitni chizen chhupae hue hai

mere aur tumhaare KHandan ki namus

meri aur tumhaari baaton ki afwahen

jab hawa bahut hi udas ho to tum mere pas aana

main tumhaari baDi baDi aankhon mein

apni ruh ki raushni bhar dunga

lekin us waqt tak main buDha ho chuka hunga