reincarnation

mire āñgan meñ bikhre zard patte

mujhe hamrāz lagte haiñ

ye jab halkī havā kī sarsarāhaT se larazte haiñ

to yuuñ lagtā hai jaise

un pe koī bhed sā khulne lagā hai

jaise un ko bāvar ho gayā hai

ki ḳhud shāḳhoñ ne be-parvā.ī se dāman chhuḌāyā hai

zamīñ ne bhī nigāheñ pher lī haiñ

unheñ mālūm hai shāyad

zamīñ pairoñ tale hī jab na ho to

jitnā marzī sar paTaḳh leñ

Tahniyoñ ko thaam leñ

be-fā.eda hai

ab unheñ be-āsrā rahnā paḌegā

kabhī pairoñ meñ aa kar charmarānā

havā ke dosh par uḌte

bikharte hī chale jaanā paḌegā

vajūd apnā kisī gumnām goshe meñ chhupā kar rā.igānī kī aziyyat un ko sahte hī chale jaanā paḌegā

ḳhayāl aatā hai

kitnī be-nishāñ be-mol be-vaq.at sī un kī zindagī hai

magar ye be-nishānī jin ḳhalāoñ ko janam detī hai

unheñ bharne ko jīvan koñpaloñ se āḳhir ik din phūTtā hai

yahī ik soch mujh ko

apne āñgan meñ bikharte charmarāte zard pattoñ se

bahut mānūs rakhtī hai

bahut nazdīk rakhtī hai

mere aangan mein bikhre zard patte

mujhe hamraaz lagte hain

ye jab halki hawa ki sarsarahaT se larazte hain

to yun lagta hai jaise

un pe koi bhed sa khulne laga hai

jaise un ko bawar ho gaya hai

ki KHud shaKHon ne be-parwai se daman chhuDaya hai

zamin ne bhi nigahen pher li hain

unhen malum hai shayad

zamin pairon tale hi jab na ho to

jitna marzi sar paTaKH len

Tahniyon ko tham len

be-faeda hai

ab unhen be-asra rahna paDega

kabhi pairon mein aa kar charmarana

hawa ke dosh par uDte

bikharte hi chale jaana paDega

wajud apna kisi gumnam goshe mein chhupa kar raigani ki aziyyat un ko sahte hi chale jaana paDega

KHayal aata hai

kitni be-nishan be-mol be-waqat si un ki zindagi hai

magar ye be-nishani jin KHalaon ko janam deti hai

unhen bharne ko jiwan konpalon se aaKHir ek din phuTta hai

yahi ek soch mujh ko

apne aangan mein bikharte charmaraate zard patton se

bahut manus rakhti hai

bahut nazdik rakhti hai