rome

maiñ jānñā chāhtā huuñ

jab rome jal rahā thā

tab vahāñ kaun kaun log maujūd the

kis shaḳhs ke kaan bāñsurī kī āvāz par lage hue the

aur kis shaḳhs kī āñkheñ

aag kī raushnī meñ chamak rahī thiiñ

maiñ jānñā chāhtā huuñ

kaun log nero kī nai-navāzī kī daad de rahe the

aur kaun aag ke sho.aloñ ko havā

kitne ārām-deh ghar is aag kī nazr ho ga.e

kitnī ālī-shān imārateñ

raakh kā Dher ban ga.iiñ

kitne logoñ kī haDDiyāñ

surme kī tarah bikhar ga.iiñ

kitne dilkash badan

mom-battī kī tarah pighal ga.e

kitne razmiya Darāme

kitne alamiya naġhme

māyūsī aur mohabbat ke kitne giit

dil āvezī aur ummīd ke kitne naqsh

nīst-o-nābūd ho ga.e

aag kī vahshat se ghabrā kar

kitne ḳhvāb safha-e-hastī se miT ga.e

rome kī is tabāhī kā record

maiñ chāhtā huuñ mujhe mil jaa.e

yā kahīñ se un logoñ imāratoñ

aur chīzoñ kī fihrist hī dastiyāb ho jaa.e

jo hamesha ke liye is aag meñ talaf ho ga.iiñ

yā phir itnī sī baat ma.alūm ho jaa.e

jab ye aag lagī to

kaun kaun nero ke saath thā

aur kaun kaun rome ke

main jaanna chahta hun

jab rome jal raha tha

tab wahan kaun kaun log maujud the

kis shaKHs ke kan bansuri ki aawaz par lage hue the

aur kis shaKHs ki aankhen

aag ki raushni mein chamak rahi thin

main jaanna chahta hun

kaun log nero ki nai-nawazi ki dad de rahe the

aur kaun aag ke shoalon ko hawa

kitne aaram-deh ghar is aag ki nazr ho gae

kitni aali-shan imaraten

rakh ka Dher ban gain

kitne logon ki haDDiyan

surme ki tarah bikhar gain

kitne dilkash badan

mom-batti ki tarah pighal gae

kitne razmiya Darame

kitne alamiya naghme

mayusi aur mohabbat ke kitne git

dil aawezi aur ummid ke kitne naqsh

nist-o-nabud ho gae

aag ki wahshat se ghabra kar

kitne KHwab safha-e-hasti se miT gae

rome ki is tabahi ka record

main chahta hun mujhe mil jae

ya kahin se un logon imaraton

aur chizon ki fihrist hi dastiyab ho jae

jo hamesha ke liye is aag mein talaf ho gain

ya phir itni si baat malum ho jae

jab ye aag lagi to

kaun kaun nero ke sath tha

aur kaun kaun rome ke