roTiyan

MORE BYNazeer Akbarabadi

    jab aadmī ke peT meñ aatī haiñ roTiyāñ

    phūlī nahīñ badan meñ samātī haiñ roTiyāñ

    āñkheñ parī-ruḳhoñ se laḌātī haiñ roTiyāñ

    siine upar bhī haath chalātī haiñ roTiyāñ

    jitne maze haiñ sab ye dikhātī haiñ roTiyāñ

    roTī se jis naak talak peT hai bharā

    kartā pare hai kyā vo uchhal kuud jā-ba-jā

    dīvār phāñd kar koī koThā uchhal gayā

    ThaTThā hañsī sharāb sanam saaqī is sivā

    sau sau tarah dhuum machātī haiñ roTiyāñ

    jis pe hāñDī chūlhā tavā aur tanūr hai

    ḳhāliq qudratoñ usī zuhūr hai

    chūlhe ke aage aañch jo chaltī huzūr hai

    jitne haiñ nuur sab meñ yahī ḳhaas nuur hai

    is nuur ke sabab nazar aatī haiñ roTiyāñ

    aave tave tanūr jis zabāñ pe naam

    chakkī chūlhe ke jahāñ gulzār hoñ tamām

    vaañ sar jhukā ke kiije DañDvat aur salām

    is vāste ki ḳhaas ye roTī ke haiñ maqām

    pahle inhīñ makānoñ meñ aatī haiñ roTiyāñ

    in roTiyoñ ke nuur se sab dil haiñ bor bor

    aaTā nahīñ hai chhalnī se chhan-chhan gire hai nuur

    peḌā har ek us hai barfī o motī chuur

    hargiz kisī tarah na bujhe peT tanūr

    is aag ko magar ye bujhātī haiñ roTiyāñ

    pūchhā kasī ne ye kisī kāmil faqīr se

    ye mehr-o-māh haq ne banā.e haiñ kaahe ke

    vo sun ke bolā baabā ḳhudā tujh ko ḳhair de

    ham to na chāñd samjheñ na sūraj haiñ jānte

    baabā hameñ to ye nazar aatī haiñ roTiyāñ

    phir pūchhā us ne kahiye ye hai dil tuur kyā

    is ke mushāhide meñ hai khultā zuhūr kyā

    vo bolā sun ke terā gayā hai shu.ūr kyā

    kashf-ul-qulūb aur ye kashf-ul-qubūr kyā

    jitne haiñ kashf sab ye dikhātī haiñ roTiyāñ

    roTī jab aa.ī peT meñ sau qand ghul ga.e

    gulzār phūle āñkhoñ meñ aur aish tul ga.e

    do tar nivāle peT meñ jab aa ke Dhul ga.e

    chaudah tabaq ke jitne the sab bhed khul ga.e

    ye kashf ye kamāl dikhātī haiñ roTiyāñ

    roTī na peT meñ ho to phir kuchh jatan na ho

    mele sair ḳhvāhish-e-bāġh-o-chaman na ho

    bhūke ġharīb dil ḳhudā se lagan na ho

    sach hai kahā kasī ne ki bhūke bhajan na ho

    allāh bhī yaad dilātī haiñ roTiyāñ

    ab aage jis ke māl-pūe bhar ke thaal haiñ

    puure bhagat unheñ kaho sāhab ke laal haiñ

    aur jin ke aage roġhnī aur shīr-māl haiñ

    aarif vahī haiñ aur vahī sāhab-kamāl haiñ

    pakkī-pakā.ī ab jinheñ aatī haiñ roTiyāñ

    kapḌe kisī ke laal haiñ roTī ke vāste

    lambe kisī ke baal haiñ roTī ke vāste

    bāñdhe koī rumāl haiñ roTī ke vāste

    sab kashf aur kamāl haiñ roTī ke vāste

    jitne haiñ ruup sab ye dikhātī haiñ roTiyāñ

    roTī se nāche pyāda qavā.ed dikhā dikhā

    asvār nāche ghoḌe ko kaava lagā lagā

    ghuñghrū ko bāñdhe paik bhī phirtā hai nāchtā

    aur is sivā jo ġhaur se dekhā to jā-ba-jā

    sau sau tarah ke naach dikhātī haiñ roTiyāñ

    roTī ke naach to haiñ sabhī ḳhalq meñ paḌe

    kuchh bhāñD bhīgte ye nahīñ phirte nāchte

    ye ranDiyāñ jo nāche haiñ ghūñghaT ko muñh pe le

    ghūñghaT na jaano dosto tum zīnhār use

    is parde meñ ye apne kamātī haiñ roTiyāñ

    ashrāfoñ ne jo apnī ye zāteñ chhupā.ī haiñ

    sach pūchhiye to apnī ye shāneñ baḌhā.ī haiñ

    kahiye unhoñ roTiyāñ kis kis ne khaa.ī haiñ

    ashrāf sab meñ kahiye to ab nān-bā.ī haiñ

    jin dukāñ se har kahīñ jaatī haiñ roTiyāñ

    duniyā meñ ab badī na kahīñ aur nikoī hai

    dushmanī o dostī tund-ḳhūī hai

    koī kisī aur kisī na koī hai

    sab koī hai usī ki jis haath Doī hai

    naukar nafar ġhulām banātī haiñ roTiyāñ

    roTī ab azal se hamārā to hai ḳhamīr

    rūkhī roTī haq meñ hamāre hai shahd-o-shīr

    patlī hove moTī ḳhamīrī ho fatīr

    gehūñ javār bājre jaisī ho 'nazīr'

    ham ko to sab tarah ḳhush aatī haiñ roTiyāñ

    jab aadmi ke peT mein aati hain roTiyan

    phuli nahin badan mein samati hain roTiyan

    aankhen pari-ruKHon se laDati hain roTiyan

    sine upar bhi hath chalati hain roTiyan

    jitne maze hain sab ye dikhati hain roTiyan

    roTi se jis ka nak talak peT hai bhara

    karta pare hai kya wo uchhal kud ja-ba-ja

    diwar phand kar koi koTha uchhal gaya

    ThaTTha hansi sharab sanam saqi is siwa

    sau sau tarah ki dhum machati hain roTiyan

    jis ja pe hanDi chulha tawa aur tanur hai

    KHaliq ki qudraton ka usi ja zuhur hai

    chulhe ke aage aanch jo chalti huzur hai

    jitne hain nur sab mein yahi KHas nur hai

    is nur ke sabab nazar aati hain roTiyan

    aawe tawe tanur ka jis ja zaban pe nam

    ya chakki chulhe ke jahan gulzar hon tamam

    wan sar jhuka ke kije DanDwat aur salam

    is waste ki KHas ye roTi ke hain maqam

    pahle inhin makanon mein aati hain roTiyan

    in roTiyon ke nur se sab dil hain bor bor

    aaTa nahin hai chhalni se chhan-chhan gire hai nur

    peDa har ek us ka hai barfi o moti chur

    hargiz kisi tarah na bujhe peT ka tanur

    is aag ko magar ye bujhati hain roTiyan

    puchha kasi ne ye kisi kaamil faqir se

    ye mehr-o-mah haq ne banae hain kahe ke

    wo sun ke bola baba KHuda tujh ko KHair de

    hum to na chand samjhen na suraj hain jaante

    baba hamein to ye nazar aati hain roTiyan

    phir puchha us ne kahiye ye hai dil ka tur kya

    is ke mushahide mein hai khulta zuhur kya

    wo bola sun ke tera gaya hai shuur kya

    kashf-ul-qulub aur ye kashf-ul-qubur kya

    jitne hain kashf sab ye dikhati hain roTiyan

    roTi jab aai peT mein sau qand ghul gae

    gulzar phule aankhon mein aur aish tul gae

    do tar niwale peT mein jab aa ke Dhul gae

    chaudah tabaq ke jitne the sab bhed khul gae

    ye kashf ye kamal dikhati hain roTiyan

    roTi na peT mein ho to phir kuchh jatan na ho

    mele ki sair KHwahish-e-bagh-o-chaman na ho

    bhuke gharib dil ki KHuda se lagan na ho

    sach hai kaha kasi ne ki bhuke bhajan na ho

    allah ki bhi yaad dilati hain roTiyan

    ab aage jis ke mal-pue bhar ke thaal hain

    pure bhagat unhen kaho sahab ke lal hain

    aur jin ke aage roghni aur shir-mal hain

    aarif wahi hain aur wahi sahab-kamal hain

    pakki-pakai ab jinhen aati hain roTiyan

    kapDe kisi ke lal hain roTi ke waste

    lambe kisi ke baal hain roTi ke waste

    bandhe koi rumal hain roTi ke waste

    sab kashf aur kamal hain roTi ke waste

    jitne hain rup sab ye dikhati hain roTiyan

    roTi se nache pyaada qawaed dikha dikha

    aswar nache ghoDe ko kawa laga laga

    ghunghru ko bandhe paik bhi phirta hai nachta

    aur is siwa jo ghaur se dekha to ja-ba-ja

    sau sau tarah ke nach dikhati hain roTiyan

    roTi ke nach to hain sabhi KHalq mein paDe

    kuchh bhanD bhigte ye nahin phirte nachte

    ye ranDiyan jo nache hain ghunghaT ko munh pe le

    ghunghaT na jaano dosto tum zinhaar use

    is parde mein ye apne kamati hain roTiyan

    ashrafon ne jo apni ye zaten chhupai hain

    sach puchhiye to apni ye shanen baDhai hain

    kahiye unhon ki roTiyan kis kis ne khai hain

    ashraf sab mein kahiye to ab nan-bai hain

    jin ki dukan se har kahin jati hain roTiyan

    duniya mein ab badi na kahin aur nikoi hai

    ya dushmani o dosti ya tund-KHui hai

    koi kisi ka aur kisi ka na koi hai

    sab koi hai usi ka ki jis hath Doi hai

    naukar nafar ghulam banati hain roTiyan

    roTi ka ab azal se hamara to hai KHamir

    rukhi hi roTi haq mein hamare hai shahd-o-shir

    ya patli howe moTi KHamiri ho ya fatir

    gehun jawar bajre ki jaisi ho 'nazir'

    hum ko to sab tarah ki KHush aati hain roTiyan

    Videos
    This video is playing from YouTube

    Videos
    This video is playing from YouTube

    Jaswinder Singh

    Jaswinder Singh

    0
    COMMENTS
    VIEW COMMENTS

    Additional information available

    Click on the INTERESTING button to view additional information associated with this sher.

    OKAY

    About this sher

    Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.

    Close

    rare Unpublished content

    This ghazal contains ashaar not published in the public domain. These are marked by a red line on the left.

    OKAY