ru-ba-ru jaanan

hameñ ab tak tirī kuchh bhī na kahne vaalī āñkhoñ se ye shikva hai

jo kamsin ḳhvāb in āñkhoñ meñ manzar kāḌhte the

vo kabhī tere laboñ ke phuul bante aur hamāre

dāman-e-iz.hār meñ khilte

hameñ in muskurāte chup laboñ se bhī shikāyat hai

hamāre sher sun kar khilkhilāte the magar kuchh bhī na kahte the

na jaane aise lamhoñ meñ tirī sochoñ pe kyā kyā rañg aate the

tujhe ham se chhupāne ke

bhī to sab Dhañg aate the

hameñ terī mohabbat se bhī shikva hai

samundar jaisī gahrī thī

magar āñkhoñ ke chhāgal se chhalaktī thī jo ham aise

faqīroñ ke diloñ par is tarah barsī

ki hariyālī ne ghar aur dasht kī pahchān se

begāna kar ke rakh diyā

ham ko ye duniyā sirf tere husn kī tajsīm lagtī thī

so ham bhī aur hamāre ḳhvāb bhī āñkheñ bhī chehra bhī

sabhī kuchh terī ḳhātir thā

magar terī mohabbat ne

hameñ is chup chapne khel meñ jo dukh diye

ab tak unheñ terī sarāb āñkhoñ se

ā.īna misāl ik guftugū kī aarzū hai rū-ba-rū jānāñ

hamein ab tak teri kuchh bhi na kahne wali aankhon se ye shikwa hai

jo kamsin KHwab in aankhon mein manzar kaDhte the

wo kabhi tere labon ke phul bante aur hamare

daman-e-izhaar mein khilte

hamein in muskuraate chup labon se bhi shikayat hai

hamare sher sun kar khilkhilate the magar kuchh bhi na kahte the

na jaane aise lamhon mein teri sochon pe kya kya rang aate the

tujhe hum se chhupane ke

bhi to sab Dhang aate the

hamein teri mohabbat se bhi shikwa hai

samundar jaisi gahri thi

magar aankhon ke chhagal se chhalakti thi jo hum aise

faqiron ke dilon par is tarah barsi

ki hariyali ne ghar aur dasht ki pahchan se

begana kar ke rakh diya

hum ko ye duniya sirf tere husn ki tajsim lagti thi

so hum bhi aur hamare KHwab bhi aankhen bhi chehra bhi

sabhi kuchh teri KHatir tha

magar teri mohabbat ne

hamein is chup chapne khel mein jo dukh diye

ab tak unhen teri sarab aankhon se

aaina misal ek guftugu ki aarzu hai ru-ba-ru jaanan