rubah-e-KHayal

raat kī sā'atoñ ke jangal meñ

saada kāġhaz se kheltī uñglī

ek tanhā lagī ghaḌī ke sivā

ek mub.ham sukūt hai lekin

koī shai hai jo zindagī lagī hai

merī khiḌkī meñ koī taara nahīñ

koī shai hai magar qarīb-tarīn

jo añdhere ke ghup samundar meñ

gahrī tanhā.ī meñ utartī hai

barf jaise siyāh nathunoñ se

koñpaloñ pattiyoñ ko chhūtī huī

ek rūbāh jis kī do āñkheñ

phailtī sabz sabz gahrā.ī

hoshiyār aur sitāra sī āñkheñ

is taraf us taraf bhaTaktī huiiñ

peḌ paudoñ tanoñ se bachtā huā

hoshiyārī se paañv rakhtā huā

barf par naqsh-e-pā banātā huā

garm nathunoñ kī bhaap kī badbū

khiḌkiyāñ ab bhī be-sitāra haiñ

aur ghaḌī bhī isī tarah tanhā

haañ magar mere saada kāġhaz par

harf hī harf likh gayā koī

raat ki sa'aton ke jangal mein

sada kaghaz se khelti ungli

ek tanha lagi ghaDi ke siwa

ek mubham sukut hai lekin

koi shai hai jo zindagi lagi hai

meri khiDki mein koi tara nahin

koi shai hai magar qarib-tarin

jo andhere ke ghup samundar mein

gahri tanhai mein utarti hai

barf jaise siyah nathunon se

konpalon pattiyon ko chhuti hui

ek rubah jis ki do aankhen

phailti sabz sabz gahrai

hoshiyar aur sitara si aankhen

is taraf us taraf bhaTakti huin

peD paudon tanon se bachta hua

hoshiyari se panw rakhta hua

barf par naqsh-e-pa banata hua

garm nathunon ki bhap ki badbu

khiDkiyan ab bhi be-sitara hain

aur ghaDi bhi isi tarah tanha

han magar mere sada kaghaz par

harf hi harf likh gaya koi