rudad-e-KHizan

kyoñ Tiis sī dil meñ uThtī hai kyoñ dard se jī ghabrātā hai

pahle to na thā aisā aalam ab dil kyoñ Duubā jaatā hai

chāhat se kisī kī sīkhā thā ġham sahnā aur aañsū piinā

lekin ab to har ashk-e-alam āñkhoñ se Tapak hī jaatā hai

ādāb-e-mohabbat kī ḳhātir rāhat ġham ko samjhe haiñ to phir

kyoñ dil se aah nikaltī hai kyoñ chakkar sā aa jaatā hai

duniyā ham se aa kar sīkhe pābandī-e-rasm-o-rāh-e-vafā

rūdād-e-ḳhizāñ dohrāte haiñ jab zikr-e-bahār aa jaatā hai

ai sharm-e-mohabbat jaag ki ab kuchh der nahīñ rusvā.ī meñ

pinhāñ thā jo dil ke parde meñ vo dard zabāñ tak aatā hai

ai kaash koī us se jā kar ye haal dil-e-barbād kahe

bīmār-e-ġham-e-ulfat terā hai naza.a meñ dam ghabrātā hai

is tarah taḌapne lagtā hai rah rah ke dil 'nāshād' aksar

jaise ki bagūla uThtā hai jaise koī tūfāñ aatā hai

kyon Tis si dil mein uThti hai kyon dard se ji ghabraata hai

pahle to na tha aisa aalam ab dil kyon Duba jata hai

chahat se kisi ki sikha tha gham sahna aur aansu pina

lekin ab to har ashk-e-alam aankhon se Tapak hi jata hai

aadab-e-mohabbat ki KHatir rahat gham ko samjhe hain to phir

kyon dil se aah nikalti hai kyon chakkar sa aa jata hai

duniya hum se aa kar sikhe pabandi-e-rasm-o-rah-e-wafa

rudad-e-KHizan dohraate hain jab zikr-e-bahaar aa jata hai

ai sharm-e-mohabbat jag ki ab kuchh der nahin ruswai mein

pinhan tha jo dil ke parde mein wo dard zaban tak aata hai

ai kash koi us se ja kar ye haal dil-e-barbaad kahe

bimar-e-gham-e-ulfat tera hai naza mein dam ghabraata hai

is tarah taDapne lagta hai rah rah ke dil 'nashad' aksar

jaise ki bagula uThta hai jaise koi tufan aata hai