ruh ki maut

chamak sake jo mirī ziist ke añdhere meñ

vo ik charāġh kisī samt se ubhar na sakā

yahāñ tumhārī nazar se bhī diip jal na sake

yahāñ tumhārā tabassum bhī kaam kar na sakā

lahū ke nāchte dhāre ke sāmne ab tak

dil-o-dimāġh kī bechārgī nahīñ jaatī

junūñ kī raah meñ sab kuchh gañvā diyā lekin

mire shu.ūr kī āvārgī nahīñ jaatī

na jaane kis liye is intihā-e-hiddat par

mirā dimāġh sulagtā hai jal nahīñ jaatā

na jaane kyuuñ har ik ummīd lauT jaane par

mire ḳhayāl kā laavā pighal nahīñ jaatā

na jaane kaun se hoñToñ kā aasrā pā kar

tumhāre hoñT mirī tishnagī ko bhuul ga.e

vahī usuul jo mohkam the narm saa.e meñ

zarā sī dhuup meñ nikle to jhuul jhuul ga.e

chamak sake jo meri zist ke andhere mein

wo ek charagh kisi samt se ubhar na saka

yahan tumhaari nazar se bhi dip jal na sake

yahan tumhaara tabassum bhi kaam kar na saka

lahu ke nachte dhaare ke samne ab tak

dil-o-dimagh ki bechaargi nahin jati

junun ki rah mein sab kuchh ganwa diya lekin

mere shuur ki aawargi nahin jati

na jaane kis liye is intiha-e-hiddat par

mera dimagh sulagta hai jal nahin jata

na jaane kyun har ek ummid lauT jaane par

mere KHayal ka lawa pighal nahin jata

na jaane kaun se honTon ka aasra pa kar

tumhaare honT meri tishnagi ko bhul gae

wahi usul jo mohkam the narm sae mein

zara si dhup mein nikle to jhul jhul gae