sal-e-nau

har samt kyoñ jahāñ meñ phailī huī ḳhushī hai

har shai pe aaj bachcho kaisī ye tāzgī hai

aamad kā sub.h kis kī paiġhām de rahī hai

tum jānte nahīñ to lo ham batā rahe haiñ

sab sāl-e-nau kī bachcho ḳhushiyāñ manā rahe haiñ

har shai meñ dilkashī hai har shai meñ bāñkpan hai

har shaḳhs aaj dekho masrūr hai magan hai

har piir shādmāñ hai har tifl ḳhanda-zan hai

kuchh log hañs rahe haiñ kuchh muskurā rahe haiñ

sab sāl-e-nau kī bachcho ḳhushiyāñ manā rahe haiñ

kaliyāñ bhī khil uThī haiñ kaisī chaTak chaTak kar

aapas meñ kheltī haiñ shāḳheñ lachak lachak kar

ḳhush-āmdīd boleñ chiḌiyāñ chahak chahak kar

ḳhushiyoñ meñ gum papīhe sab ġhul machā rahe haiñ

sab sāl-e-nau kī bachcho ḳhushiyāñ manā rahe haiñ

maidāñ meñ aaj maḳhmal phailī huī hai har sū

gulshan meñ aaj kaisī mahkī huī hai ḳhushbū

sahrā meñ ghūmte haiñ ḳhush ho ke aaj aahū

pur-kaif ye manāzir dil ko lubhā rahe haiñ

sab sāl-e-nau kī bachcho ḳhushiyāñ manā rahe haiñ

har samt kyon jahan mein phaili hui KHushi hai

har shai pe aaj bachcho kaisi ye tazgi hai

aamad ka subh kis ki paigham de rahi hai

tum jaante nahin to lo hum bata rahe hain

sab sal-e-nau ki bachcho KHushiyan mana rahe hain

har shai mein dilkashi hai har shai mein bankpan hai

har shaKHs aaj dekho masrur hai magan hai

har pir shadman hai har tifl KHanda-zan hai

kuchh log hans rahe hain kuchh muskura rahe hain

sab sal-e-nau ki bachcho KHushiyan mana rahe hain

kaliyan bhi khil uThi hain kaisi chaTak chaTak kar

aapas mein khelti hain shaKHen lachak lachak kar

KHush-amdid bolen chiDiyan chahak chahak kar

KHushiyon mein gum papihe sab ghul macha rahe hain

sab sal-e-nau ki bachcho KHushiyan mana rahe hain

maidan mein aaj maKHmal phaili hui hai har su

gulshan mein aaj kaisi mahki hui hai KHushbu

sahra mein ghumte hain KHush ho ke aaj aahu

pur-kaif ye manazir dil ko lubha rahe hain

sab sal-e-nau ki bachcho KHushiyan mana rahe hain