sal ka iKHtitam

saal apne iḳhtitām par udaas lauT rahā hai

bārah mahīne udaas rahne ke baad

maiñ ab muskurāne kī mashqeñ kar rahā huuñ

taaki maiñ bhī na.e saal meñ muskurā sakūñ

añdhere ne ujāle ke saath mil kar

jhagḌā ḳhatm kar ke ek ḳhufiya muāhida kar liyā hai

raat ab añdhere ke sautele

ravayye se ḳhaufzada hai

ikkīs december kī raat maiñ ne apnī zindagī kī

tamām filoñ kī chhān-bīn kī magar

mujhe sukūn ke saare safhāt ḳhālī mile

raat ke vaqt āsmān se

bahne vaalī udāsī ab tham chukī hai

chamakte sitāroñ ne sāl-bhar āsmān ko

ḳhūb-sūratī baḳhshne ke baad ab ma.azarat kar lī hai

tamām ġham-zada logoñ ne mushāvaratī ijlās meñ udāsī ko devī muqarrar kar diyā hai

sāl-bhar udāsiyāñ ḳharīdne vaale būḌhe ne guzishta raat

zindagī se ma.azarat kar lī hai

lekin saal ab dinoñ se mushāvarat ke baad

terahveñ mahīne kī paidā.ish kā soch rahā hai

sal apne iKHtitam par udas lauT raha hai

barah mahine udas rahne ke baad

main ab muskurane ki mashqen kar raha hun

taki main bhi nae sal mein muskura sakun

andhere ne ujale ke sath mil kar

jhagDa KHatm kar ke ek KHufiya muahida kar liya hai

raat ab andhere ke sautele

rawayye se KHaufzada hai

ikkis december ki raat main ne apni zindagi ki

tamam filon ki chhan-bin ki magar

mujhe sukun ke sare safhat KHali mile

raat ke waqt aasman se

bahne wali udasi ab tham chuki hai

chamakte sitaron ne sal-bhar aasman ko

KHub-surati baKHshne ke baad ab mazarat kar li hai

tamam gham-zada logon ne mushawarati ijlas mein udasi ko dewi muqarrar kar diya hai

sal-bhar udasiyan KHaridne wale buDhe ne guzishta raat

zindagi se mazarat kar li hai

lekin sal ab dinon se mushawarat ke baad

terahwen mahine ki paidaish ka soch raha hai