samraj ki shikast

mādar-e-hind ke māthe kī shikan duur huī

chaar sau saal kī zillat kā nishāñ

shukr hai maġhribī tāqat kī ‘ufūnat bharī saañs

TuuT kar Duub ga.ī ḳhatm huā afsāna

ab goa meñ na koī ġhair jamā.egā qadam

hurriyat ‘azmat-o-‘izzat kā muqaddas parcham

ḳhushnumā sāhilī maidānoñ pe lahrā.egā

jal-parī gā.egī āzādī kā giit

lahreñ uTh uTh ke salāmī deñgī

gungunā.eñgī havā.eñ ki gayā daur-e-ḳhizāñ

mādar-e-hind ke hoñToñ pe tabassum hogā

aur peshānī pe sindūr kā ik nuqta-e-surḳh

us sipāhī kī hameñ yaad dilā.egā sadā

ḳhuun kā jis ne diyā bāġh-e-vatan ko tohfa

garche gumnām rahā daad kā tālib na huā

aah gumnām sipāhī tirī turbat ko salām

madar-e-hind ke mathe ki shikan dur hui

chaar sau sal ki zillat ka nishan

shukr hai maghribi taqat ki ‘ufunat bhari sans

TuT kar Dub gai KHatm hua afsana

ab goa mein na koi ghair jamaega qadam

hurriyat ‘azmat-o-‘izzat ka muqaddas parcham

KHushnuma sahili maidanon pe lahraega

jal-pari gaegi aazadi ka git

lahren uTh uTh ke salami dengi

gungunaengi hawaen ki gaya daur-e-KHizan

madar-e-hind ke honTon pe tabassum hoga

aur peshani pe sindur ka ek nuqta-e-surKH

us sipahi ki hamein yaad dilaega sada

KHun ka jis ne diya bagh-e-watan ko tohfa

garche gumnam raha dad ka talib na hua

aah gumnam sipahi teri turbat ko salam