sanp ko pakaD lo

mandir kī raushnī meñ

masjid kī raushnī meñ

kyoñ kohrā baḌh rahā hai

kyoñ kohrā chhā rahā hai

dīvār par ye kaalī

tasvīr kis ne khīñchī

kis ne banā diyā hai

kohre kā zard chehra

ik darmiyāñ hamāre

kyoñ chīḳhtī balā.eñ

āñgan meñ nāchtī haiñ

ma.asūm zard chehre

kamroñ meñ chhup rahe haiñ

maaoñ kī god ḳhālī

bahnoñ kī maañg suunī

ye kaun aa rahā hai

dahshat kā ruup dhāre

mandir kī raushnī meñ

masjid kī raushnī meñ

vo kaun hai jo yaaro

talvār ke qalam se

taqdīr likh rahā hai

merī aur tumhārī

vo kaun hai jo chhup kar

neze chalā rahā hai

ye āsmāñ kī laalī

mehñdī kī hai yā ḳhuuñ kī

kyoñ kohrā chhā rahā hai

kyoñ kohrā baḌh rahā hai

āñkhoñ meñ kyoñ hamārī

dhuāñ sā tairtā hai

mandir kī raushnī meñ

masjid kī raushnī meñ

mahbūb kī galī meñ

bārūd kī mahak hai

sūraj pighal rahā hai

dhartī laraz rahī hai

ik aag sī lagī hai

sahmī huī havā.eñ

sahmī huī fazā.eñ

gulshan jhulas rahā hai

bastī ujaḌ rahī hai

mahbūb kī galī meñ

ye kaun ro rahā hai

ye kis kā ghar jalā hai

ye kis kā ghar luTā hai

dil meñ hai ḳhauf taarī

lab sil ga.e haiñ mere

lab sil ga.e tumhāre

mandir kī raushnī meñ

masjid kī raushnī meñ

kaise yaqīn kar luuñ

insān mar gayā hai

kaise yaqīn kar luuñ

kohre kā zard chehra

hai darmiyāñ hamāre

kaise yaqīn kar luuñ

mahbūb kī galī meñ

bārūd kī mahak hai

dekho kahīñ ye chehra

badnām ho na jaa.e

dekho kahīñ ye kohra

har dil meñ bhar na jaa.e

aao use pakaḌ leñ

jo saañp ban gayā hai

mandir kī raushnī meñ

masjid kī raushnī meñ

mandir ki raushni mein

masjid ki raushni mein

kyon kohra baDh raha hai

kyon kohra chha raha hai

diwar par ye kali

taswir kis ne khinchi

kis ne bana diya hai

kohre ka zard chehra

ek darmiyan hamare

kyon chiKHti balaen

aangan mein nachti hain

masum zard chehre

kamron mein chhup rahe hain

maon ki god KHali

bahnon ki mang suni

ye kaun aa raha hai

dahshat ka rup dhaare

mandir ki raushni mein

masjid ki raushni mein

wo kaun hai jo yaro

talwar ke qalam se

taqdir likh raha hai

meri aur tumhaari

wo kaun hai jo chhup kar

neze chala raha hai

ye aasman ki lali

mehndi ki hai ya KHun ki

kyon kohra chha raha hai

kyon kohra baDh raha hai

aankhon mein kyon hamari

dhuan sa tairta hai

mandir ki raushni mein

masjid ki raushni mein

mahbub ki gali mein

barud ki mahak hai

suraj pighal raha hai

dharti laraz rahi hai

ek aag si lagi hai

sahmi hui hawaen

sahmi hui fazaen

gulshan jhulas raha hai

basti ujaD rahi hai

mahbub ki gali mein

ye kaun ro raha hai

ye kis ka ghar jala hai

ye kis ka ghar luTa hai

dil mein hai KHauf tari

lab sil gae hain mere

lab sil gae tumhaare

mandir ki raushni mein

masjid ki raushni mein

kaise yaqin kar lun

insan mar gaya hai

kaise yaqin kar lun

kohre ka zard chehra

hai darmiyan hamare

kaise yaqin kar lun

mahbub ki gali mein

barud ki mahak hai

dekho kahin ye chehra

badnam ho na jae

dekho kahin ye kohra

har dil mein bhar na jae

aao use pakaD len

jo sanp ban gaya hai

mandir ki raushni mein

masjid ki raushni mein