sanp sapera aur main

ek saperā merī galī meñ aa niklā kal shaam

us kī āñkheñ chamkīlī thiiñ aur āñkheñ sañgīn

lekin ras meñ bhīge naġhme chheḌ rahī thī biin

naġhme jin meñ jaag rahe the duniyā ke ālām

us ke gale meñ saañp paḌā thā jaise koī haar

us ne gale se saañp utārā aur kahā ki jhuum

miTTī chaaT ke pyaar se bābū-jī ke paañv chuum

saañp ne mujh ko jhuum ke chūmnā chāhā jo ik baar

maiñ ghabrā ke pīchhe haTā aur maiñ ne kahā nādān!

saañp ki patthar toḌ ke rakh de jis kā zahrī vaar

saañp ko kaun sikhā saktā hai insānoñ se pyaar

is ko nekī aur badī kī kyā hogī pahchān

hañs ke saperā bolā baabū mujh se ho ga.ī bhuul

tum jo ik duuje ke gale par rakhte ho talvār

tum shahroñ ke baasī kyā samjhoge kyā hai pyaar

mere liye ye saañp haiñ mere sundar ban ke phuul

māthe par ye kanThā dekho jaise koī taaj

ye raaja haiñ par nahīñ piite kamzoroñ kā ḳhuun

ye nahīñ mārte ik duuje ke ḳhemoñ par shab-ḳhūn

ye nahīñ lūTte apnī maaoñ aur bahnoñ kī laaj

ye nahīñ Dasne vaale in par Daal ke dekho haath

ḳhush-qismat ho aur tumhāre achchhe haiñ hālāt

tum insān-gazīda ho kar samjhoge ye baat

insānoñ kā saath burā hai yā sāñpoñ kā saath

ek sapera meri gali mein aa nikla kal sham

us ki aankhen chamkili thin aur aankhen sangin

lekin ras mein bhige naghme chheD rahi thi bin

naghme jin mein jag rahe the duniya ke aalam

us ke gale mein sanp paDa tha jaise koi haar

us ne gale se sanp utara aur kaha ki jhum

miTTi chaT ke pyar se babu-ji ke panw chum

sanp ne mujh ko jhum ke chumna chaha jo ek bar

main ghabra ke pichhe haTa aur main ne kaha nadan!

sanp ki patthar toD ke rakh de jis ka zahri war

sanp ko kaun sikha sakta hai insanon se pyar

is ko neki aur badi ki kya hogi pahchan

hans ke sapera bola babu mujh se ho gai bhul

tum jo ek duje ke gale par rakhte ho talwar

tum shahron ke basi kya samjhoge kya hai pyar

mere liye ye sanp hain mere sundar ban ke phul

mathe par ye kanTha dekho jaise koi taj

ye raja hain par nahin pite kamzoron ka KHun

ye nahin marte ek duje ke KHemon par shab-KHun

ye nahin luTte apni maon aur bahnon ki laj

ye nahin Dasne wale in par Dal ke dekho hath

KHush-qismat ho aur tumhaare achchhe hain haalat

tum insan-gazida ho kar samjhoge ye baat

insanon ka sath bura hai ya sanpon ka sath