saqi-e-mai-KHana

ai dilbar-e-farzāna ai sāqi-e-mai-ḳhāna

terī mai-e-sahbā kā maiñ sā.il-e-tishna thā

ye aas thī mujh ko bhī kar doge 'atā paiham

paimāna-e-rindāna

ai sāqi-e-mai-ḳhāna

lekin ye tamanna bhī tishna hī rahī āḳhir

kyā farq paḌe tujh ko is girya-e-paiham kā

har ek parī-rū kī hai sang-dilī fitrat

is vāste tū ne bhī dikhlā.ī hai apnī ḳhū

patthar bhī pighal jaa.e rūdād-e-tamanna se

afsos mire dilbar par pighlā na dil terā

baḳhshā hai ġhamoñ kā to ik koh-e-garāñ-māya

ai sāqi-e-mai-ḳhāna ai sāqi-e-mai-ḳhāna

sargam hai tū nusrat kā tū raag hai darbārī

bandish hai ḳhayāloñ kī tū lahn hai dā.ūdī

ḳhāliq ne tujhe goyā taḳhlīq kiyā aise

terā ye sarāpā hai

'hāfiz' kī ġhazal-goī 'āzād' kī goyā.ī

sach hai ki mile tujh se

ash'ār ko rā'nā.ī sangīt ko sachchā.ī

tū 'ishq kā hai naġhma

ek nā'ra-e-mastāna

ai sāqi-e-mai-ḳhāna ai sāqi-e-mai-ḳhāna

ai dilbar-e-farzana ai saqi-e-mai-KHana

teri mai-e-sahba ka main sail-e-tishna tha

ye aas thi mujh ko bhi kar doge 'ata paiham

paimana-e-rindana

ai saqi-e-mai-KHana

lekin ye tamanna bhi tishna hi rahi aaKHir

kya farq paDe tujh ko is girya-e-paiham ka

har ek pari-ru ki hai sang-dili fitrat

is waste tu ne bhi dikhlai hai apni KHu

patthar bhi pighal jae rudad-e-tamanna se

afsos mere dilbar par pighla na dil tera

baKHsha hai ghamon ka to ek koh-e-garan-maya

ai saqi-e-mai-KHana ai saqi-e-mai-KHana

sargam hai tu nusrat ka tu rag hai darbari

bandish hai KHayalon ki tu lahn hai daudi

KHaliq ne tujhe goya taKHliq kiya aise

tera ye sarapa hai

'hafiz' ki ghazal-goi 'azad' ki goyai

sach hai ki mile tujh se

ash'ar ko ra'nai sangit ko sachchai

tu 'ishq ka hai naghma

ek na'ra-e-mastana

ai saqi-e-mai-KHana ai saqi-e-mai-KHana