sarban

khujūroñ se mahkī huī shaam thī

shutur par maal o asbāb thā aur maiñ ik sarā.e ke dar par khaḌā

raat karne ko ik boriye kā talabgār thā

TimTimātī huī sham.a kī lau meñ ibn-e-tamāma kā saaya

(jo māhaul ghere hue thaa)

use dekh kar yuuñ lagā jaise vo raushnī phāñktā ho

qavī-ul-jasāmat

harīs aañkh se lahza lahza Tapaktī kamīnī ḳhushī

bhāv-tāv meñ choukas choukas

asā aur laTkī huī riish

(do azdahoñ kī tarah)

vo sarā.e kī gandī fazā ko mahaktā huā ḳhuld kahtā

musāfir diram aur dīnār de kar vahāñ ḳhvāb karte

mujhe umm-e-lailā kī farmā.ish khā ga.ī haiñ

zamāne kā shutur aan pahuñchā hai aise kuoñ tak jahāñ tel hai

maiñ magar

aaj bhī is sarā.e meñ ibn-e-tamāma se bāteñ kiye jā rahā huuñ

abhī umm-e-lailā kī kuchh hasrateñ aur bhī haiñ

khujuron se mahki hui sham thi

shutur par mal o asbab tha aur main ek sarae ke dar par khaDa

raat karne ko ek boriye ka talabgar tha

TimTimati hui shama ki lau mein ibn-e-tamama ka saya

(jo mahaul ghere hue tha)

use dekh kar yun laga jaise wo raushni phankta ho

qawi-ul-jasamat

haris aankh se lahza lahza Tapakti kamini KHushi

bhaw-taw mein choukas choukas

asa aur laTki hui rish

(do azdahon ki tarah)

wo sarae ki gandi faza ko mahakta hua KHuld kahta

musafir diram aur dinar de kar wahan KHwab karte

mujhe umm-e-laila ki farmaish kha gai hain

zamane ka shutur aan pahuncha hai aise kuon tak jahan tel hai

main magar

aaj bhi is sarae mein ibn-e-tamama se baaten kiye ja raha hun

abhi umm-e-laila ki kuchh hasraten aur bhi hain