sat paheliyan

bilāl 'asvad'

kaun sā saaz hai

jo kānoñ meñ

sātoñ sur dahkā saktā hai

kaun sā manzar

āñkhoñ andar

sat-rañgī sulgā saktā hai

kyā koī dariyā aisā bhī hai

jis ke saath maiñ bah kar

saat ke saat samundar paar ho jaa.eñ

kyā koī lamha aisā bhī hai

jis kā puurā dukh jī lo to

saat janam svīkār ho jaa.eñ

kis hairat ko oḌhe

ek ajūba dekheñ

aur sātoñ ko saath meñ paa.eñ

is dhartī ke kis kone par

jā kar saat zamīneñ DhūñDeñ

aur un sab kī miTTī apne haath meñ paa.eñ

kis taare par sīḌhī rakh kar

apne rab kā mimbar dekheñ

aur phir in ġhaibī āñkhoñ se

us ke sātoñ ambar dekheñ

bilal 'aswad'

kaun sa saz hai

jo kanon mein

saton sur dahka sakta hai

kaun sa manzar

aankhon andar

sat-rangi sulga sakta hai

kya koi dariya aisa bhi hai

jis ke sath main bah kar

sat ke sat samundar par ho jaen

kya koi lamha aisa bhi hai

jis ka pura dukh ji lo to

sat janam swikar ho jaen

kis hairat ko oDhe

ek ajuba dekhen

aur saton ko sath mein paen

is dharti ke kis kone par

ja kar sat zaminen DhunDen

aur un sab ki miTTi apne hath mein paen

kis tare par siDhi rakh kar

apne rab ka mimbar dekhen

aur phir in ghaibi aankhon se

us ke saton ambar dekhen