sawan ka andha

samajhdār shā.ir ne ahl-e-sitam kī samā.at ke dar ko bahut zor se khaTkhaTāyā

falak ke badan se lahū ris rahā thā jise dekh kar ye zamīñ ḳhūn-ālūd qai kar rahī thī

janāze bhī qabroñ se bāhar nikalne lage the

ye bārūd se ḳhuun ham-bistarī karne ke baad vīrān raste pe phailā huā thā

mashaqqat kā girya jūñhī hichkiyoñ meñ badalne lagā thā

to fauran pahāḌoñ ne apnī jagah chhoḌ dī thī

ye sun ke sitam karne vāloñ kī murda zabānoñ meñ jumbish huī jhuuT baktā hai shā.ir

yahāñ kuchh bhī aisā nahīñ hai

falak to samundar ke rangoñ meñ rangā huā hai

zamīñ sabz thī sabz hai aur harī hī rahegī

yahāñ ḳhuun kī surḳhī bilkul nahīñ hai

yahāñ sab harā hī harā hai

vo zill-e-ilāhī

vo jaañ kī amaañ dene vaale

shahanshāh-e-ālam ne ham ko ye sab kuchh batāyā

ḳhudā ham ko baḳhshe

hamāre shahanshāh-e-ālam kī aisī zabān-e-muqaddas hai jis par kabhī jhuuT reñgā nahīñ hai

phir ik dam unhī zulm ke nā-ḳhudāoñ kī āñkheñ barasne lagīñ jab unheñ yaad aaya

ki zill-e-ilāhī to sāvan meñ andhe hue the

samajhdar shair ne ahl-e-sitam ki samaat ke dar ko bahut zor se khaTkhaTaya

falak ke badan se lahu ris raha tha jise dekh kar ye zamin KHun-alud qai kar rahi thi

janaze bhi qabron se bahar nikalne lage the

ye barud se KHun ham-bistari karne ke baad viran raste pe phaila hua tha

mashaqqat ka girya junhi hichkiyon mein badalne laga tha

to fauran pahaDon ne apni jagah chhoD di thi

ye sun ke sitam karne walon ki murda zabanon mein jumbish hui jhuT bakta hai shair

yahan kuchh bhi aisa nahin hai

falak to samundar ke rangon mein ranga hua hai

zamin sabz thi sabz hai aur hari hi rahegi

yahan KHun ki surKHi bilkul nahin hai

yahan sab hara hi hara hai

wo zill-e-ilahi

wo jaan ki aman dene wale

shahanshah-e-alam ne hum ko ye sab kuchh bataya

KHuda hum ko baKHshe

hamare shahanshah-e-alam ki aisi zaban-e-muqaddas hai jis par kabhi jhuT renga nahin hai

phir ek dam unhi zulm ke na-KHudaon ki aankhen barasne lagin jab unhen yaad aaya

ki zill-e-ilahi to sawan mein andhe hue the