sawan

koyal kī surīlī tānoñ par tham tham ke papīhā gaatā hai

hal ho ke havā kī lahroñ meñ sāvan kā mahīna aatā hai

ThanDī purvā kaalā bādal barsā to barastā jaatā hai

būñdoñ kī musalsal choToñ se pattā pattā tharrātā hai

aise meñ koī yaad aatā hai aise meñ koī yaad aatā hai

ghanghor ghaTā bijlī paanī dil siine meñ lahrātā hai

sahrā meñ havā bal khātī hai bādal ko sabā sankātī hai

paanī se zamīñ narmātī hai sabzoñ se fazā lahrātī hai

rim-jhim rim-jhim tham tham tham tham būñdoñ kī sadā jab aatī hai

har buuñd se dil ke tāroñ par ik choT sī paḌtī jaatī hai

aise meñ koī yaad aatā hai aise meñ koī yaad aatā hai

ghanghor ghaTā bijlī paanī dil siine meñ lahrātā hai

badlī ke dinoñ mai-ḳhvānoñ meñ sahbā kī ravānī kyā kahnā

rātoñ kī sharāb-o-shāhid se palkoñ kī girānī kyā kahnā

har vaqt suhānā kyā kahnā har raat suhānī kyā kahnā

barsāt ke bhīge lamhoñ meñ shādāb javānī kyā kahnā

aise meñ koī yaad aatā hai aise meñ koī yaad aatā hai

ghanghor ghaTā bijlī paanī dil siine meñ lahrātā hai

rañgīñ gulshan rañgī sahrā rañgī duniyā rañgī bāteñ

nāche kheleñ dauḌeñ bhāgeñ rātoñ jāgeñ nīñdoñ māteñ

kyā qahr hai zālim barsāteñ kyā qahr hai zālim barsāteñ

bhīgī duniyā bhīgī sāñseñ bhīge armāñ bhīgī rāteñ

aise meñ koī yaad aatā hai aise meñ koī yaad aatā hai

ghanghor ghaTā bijlī paanī dil siine meñ lahrātā hai

sāvan jo chaḌhā phir bāġhoñ aur jhūloñ kī bāteñ hotī haiñ

gulshan kī rañgīñ sairoñ meñ kuchh rañgīñ dhāteñ hotī haiñ

jab ahd-e-javānī kī ThanDī ThanDī barsāteñ hotī haiñ

matvālī umreñ hotī haiñ matvālī rāteñ hotī haiñ

aise meñ koī yaad aatā hai aise meñ koī yaad aatā hai

ghanghor ghaTā bijlī paanī dil siine meñ lahrātā hai

koyal ki surili tanon par tham tham ke papiha gata hai

hal ho ke hawa ki lahron mein sawan ka mahina aata hai

ThanDi purwa kala baadal barsa to barasta jata hai

bundon ki musalsal choTon se patta patta tharraata hai

aise mein koi yaad aata hai aise mein koi yaad aata hai

ghanghor ghaTa bijli pani dil sine mein lahraata hai

sahra mein hawa bal khati hai baadal ko saba sankati hai

pani se zamin narmati hai sabzon se faza lahraati hai

rim-jhim rim-jhim tham tham tham tham bundon ki sada jab aati hai

har bund se dil ke taron par ek choT si paDti jati hai

aise mein koi yaad aata hai aise mein koi yaad aata hai

ghanghor ghaTa bijli pani dil sine mein lahraata hai

badli ke dinon mai-KHwanon mein sahba ki rawani kya kahna

raaton ki sharab-o-shahid se palkon ki girani kya kahna

har waqt suhana kya kahna har raat suhani kya kahna

barsat ke bhige lamhon mein shadab jawani kya kahna

aise mein koi yaad aata hai aise mein koi yaad aata hai

ghanghor ghaTa bijli pani dil sine mein lahraata hai

rangin gulshan rangi sahra rangi duniya rangi baaten

nache khelen dauDen bhagen raaton jagen nindon maten

kya qahr hai zalim barsaten kya qahr hai zalim barsaten

bhigi duniya bhigi sansen bhige arman bhigi raaten

aise mein koi yaad aata hai aise mein koi yaad aata hai

ghanghor ghaTa bijli pani dil sine mein lahraata hai

sawan jo chaDha phir baghon aur jhulon ki baaten hoti hain

gulshan ki rangin sairon mein kuchh rangin dhaten hoti hain

jab ahd-e-jawani ki ThanDi ThanDi barsaten hoti hain

matwali umren hoti hain matwali raaten hoti hain

aise mein koi yaad aata hai aise mein koi yaad aata hai

ghanghor ghaTa bijli pani dil sine mein lahraata hai