sachcha aaina

barsoñ pahle fasl-e-bahār kī aamad par

ik din aañkh ne ye manzar bhī dekhā thā

ek nazar-paimā shān-e-rā’nā.ī se

ā.īne ke sāmne vo yuuñ baiThā thā

haath meñ ḳhāma kāġhaz par naqsh-e-tahrīr

sar ko jhukā.e shāyad vo ḳhat likhtā thā

jaise sehn-e-gulistāñ meñ tā.ūs chale

dast-e-hinā.ī kāġhaz par yuuñ chaltā thā

merī nazar us do-rangī se hairāñ thī

ā.īne meñ 'aks to ḳhat kā ulTā thā

lekin likhne vaale kī sūrat kā 'aks

fankārī ke puure husn se ubhrā thā

vaisā hī thā ā.īne ke bāhar bhī

ā.īne ke andar chehra jaisā thā

‘aks-e-ruḳh sīdhā ‘aks-e-tahrīr ulTā

jhūTā thā ā.īna phir bhī sachchā thā

barson pahle fasl-e-bahaar ki aamad par

ek din aankh ne ye manzar bhi dekha tha

ek nazar-paima shan-e-ra’nai se

aaine ke samne wo yun baiTha tha

hath mein KHama kaghaz par naqsh-e-tahrir

sar ko jhukae shayad wo KHat likhta tha

jaise sehn-e-gulistan mein taus chale

dast-e-hinai kaghaz par yun chalta tha

meri nazar us do-rangi se hairan thi

aaine mein 'aks to KHat ka ulTa tha

lekin likhne wale ki surat ka 'aks

fankari ke pure husn se ubhra tha

waisa hi tha aaine ke bahar bhi

aaine ke andar chehra jaisa tha

‘aks-e-ruKH sidha ‘aks-e-tahrir ulTa

jhuTa tha aaina phir bhi sachcha tha