sahaara

zahr piitā rahā hoñToñ ko masaltā hī rahā

ye gumāñ thā ki mai-e-nāb se jī bhar na sakā

kaun aaya thā ki jaagā thā mire dil kā charāġh

kaun aaya thā ki chhalkā thā mohabbat kā ayāġh

ḳhvāb ke Dher se pahle to dhuāñ uThtā thā

kaun aaya ki isī Dher se gulzār banā

maiñ ne gulzār hī samjhā thā magar kyā kiije

raat bhar chain na aaya kisī karvaT mujh ko

chashm-e-be-ḳhvāb kī saugand kise duuñ āḳhir

zard hote hue chehre meñ asar bhī to nahīñ

merī vīrān nigāhoñ meñ guhar bhī to nahīñ

ab na jā.ūñgā maiñ afsar ke makāñ kī jānib

maiñ guhar bech ke kuchh pā na sakūñgā shāyad

phir koī aa ke lab-e-bām hī rah jā.egā

maiñ jahannum kī usī aag meñ jal jā.ūñgā

lekin ab ye na kahūñgā ki sahārā na milā

zahr pita raha honTon ko masalta hi raha

ye guman tha ki mai-e-nab se ji bhar na saka

kaun aaya tha ki jaga tha mere dil ka charagh

kaun aaya tha ki chhalka tha mohabbat ka ayagh

KHwab ke Dher se pahle to dhuan uThta tha

kaun aaya ki isi Dher se gulzar bana

main ne gulzar hi samjha tha magar kya kije

raat bhar chain na aaya kisi karwaT mujh ko

chashm-e-be-KHwab ki saugand kise dun aaKHir

zard hote hue chehre mein asar bhi to nahin

meri viran nigahon mein guhar bhi to nahin

ab na jaunga main afsar ke makan ki jaanib

main guhar bech ke kuchh pa na sakunga shayad

phir koi aa ke lab-e-baam hi rah jaega

main jahannum ki usi aag mein jal jaunga

lekin ab ye na kahunga ki sahaara na mila