sahih darwaza

mujhe suno

aur merā yaqīn karo

merā vatan

insāf ke naġhmoñ kā pyāsā hai

tumheñ merā yaqīn ho to

aao

ham ek nayā nusḳha tayyār kareñ

jab abnā-e-vatan

ulTe laTkā.e jā rahe hoñ

ḳhāmoshī ke saath

na.e dinoñ kī shurūāt mumkin nahīñ

mujhe afsos hai

maiñ ne kuchh rākshas dekhe haiñ

vo mujh se ziyāda

ḳhūbsūrat haiñ aur ḳhush-nasīb

vo sune jaate haiñ

lākhoñ kī ta.adād meñ

hazār chehroñ ke mālik haiñ vo

magar hairat-angez haiñ vo log

jo baġhair āñkhoñ vaale haiñ

vo kabhī bhī dekh sakte haiñ

shāyad maiñ ne

ḳhizāñ-rasīda peḌoñ ko

lambe arse tak

zamīñ-bos hote dekhā hai

maiñ ne ehtijāj ke liye

jis din kā ta.ayyun kiyā thā

logoñ ne use ek

isti.māl shuda kapḌe kī tarah

Dhulne ke liye pare rakh diyā hai

agar tumheñ yaqīn hai

tum giit gā sakte ho

to tumheñ lafzoñ par paḌī zanjīroñ kī

shanāḳht karnī hogī

agar sahī dekhnā chāhte ho tum

lense par paḌī gard haTānī hogī

sūrat-e-hāl is qadar māyūs-kun bhī nahīñ

jab insāf-gāhoñ ke anginat

darvāze hoñ

aur hameñ sahī darvāze tak pahuñchnā hai

to ek sileTī āsmān ke nīche

shāna-ba-shāna ek lambā fāsla tai karnā hogā

aur maiñ yaqīn dilātā huuñ

ye fāsla hairat-angez vāqi.āt se pur hai

mujhe suno

aur mera yaqin karo

mera watan

insaf ke naghmon ka pyasa hai

tumhein mera yaqin ho to

aao

hum ek naya nusKHa tayyar karen

jab abna-e-watan

ulTe laTkae ja rahe hon

KHamoshi ke sath

nae dinon ki shuruat mumkin nahin

mujhe afsos hai

main ne kuchh rakshas dekhe hain

wo mujh se ziyaada

KHubsurat hain aur KHush-nasib

wo sune jate hain

lakhon ki tadad mein

hazar chehron ke malik hain wo

magar hairat-angez hain wo log

jo baghair aankhon wale hain

wo kabhi bhi dekh sakte hain

shayad main ne

KHizan-rasida peDon ko

lambe arse tak

zamin-bos hote dekha hai

main ne ehtijaj ke liye

jis din ka tayyun kiya tha

logon ne use ek

istimal shuda kapDe ki tarah

Dhulne ke liye pare rakh diya hai

agar tumhein yaqin hai

tum git ga sakte ho

to tumhein lafzon par paDi zanjiron ki

shanaKHt karni hogi

agar sahi dekhna chahte ho tum

lense par paDi gard haTani hogi

surat-e-haal is qadar mayus-kun bhi nahin

jab insaf-gahon ke anginat

darwaze hon

aur hamein sahi darwaze tak pahunchna hai

to ek sileTi aasman ke niche

shana-ba-shana ek lamba fasla tai karna hoga

aur main yaqin dilata hun

ye fasla hairat-angez waqiat se pur hai