samita-paTil

dil ke mandar meñ ḳhushbū hai lobān kii, ghanTiyāñ baj uThīñ, dev-dāsī thī vo

kitne sarkash añdheroñ meñ jaltī rahī dekhne meñ to mash.al zarā sī thī vo

nuur o naġhma kī rim-jhim phuvāroñ tale muskurātī huī ik udāsī thī vo

pāniyoñ kī farāvāniyoñ meñ ravāñ us kī hairāniyāñ kitnī pyāsī thī vo

husn-e-insāñ se fitrat kī sargoshiyāñ ghul ga.iiñ tere lahje kī jhankār meñ

fan kī takmīl sachchā sarāpā tirā, be-zabānī ko laayā jo iz.hār meñ

muddatoñ tak numā.ish kī ḳhvāhish rahī zindagī tab Dhalī tere kirdār meñ

jo thī zinda mohabbat kī buniyād par vaqt ne chun diyā us ko dīvār meñ

dhuup har ruup meñ, ret har khet meñ, fasl jazbāt par ḳhushk-sālī rahe

do ghaḌī dil kisī ke ḳhayāloñ meñ gum aur phir umr bhar be-ḳhayālī rahe

aa.ina ab tarastā rahe aks ko aur nazar raushnī kī savālī rahe

mere hisse kā ye aañkh bhar āsmāñ jagmagāte sitāre se ḳhālī rahe

dil ke mandar mein KHushbu hai loban ki, ghanTiyan baj uThin, dew-dasi thi wo

kitne sarkash andheron mein jalti rahi dekhne mein to mashal zara si thi wo

nur o naghma ki rim-jhim phuwaron tale muskuraati hui ek udasi thi wo

paniyon ki farawaniyon mein rawan us ki hairaniyan kitni pyasi thi wo

husn-e-insan se fitrat ki sargoshiyan ghul gain tere lahje ki jhankar mein

fan ki takmil sachcha sarapa tira, be-zabani ko laya jo izhaar mein

muddaton tak numaish ki KHwahish rahi zindagi tab Dhali tere kirdar mein

jo thi zinda mohabbat ki buniyaad par waqt ne chun diya us ko diwar mein

dhup har rup mein, ret har khet mein, fasl jazbaat par KHushk-sali rahe

do ghaDi dil kisi ke KHayalon mein gum aur phir umr bhar be-KHayali rahe

aaina ab tarasta rahe aks ko aur nazar raushni ki sawali rahe

mere hisse ka ye aankh bhar aasman jagmagate sitare se KHali rahe