samundar ki tah mein

samundar kī tah meñ

samundar kī sañgīn tah meñ

hai sandūq

sandūq meñ ek Dibiyā meñ Dibiyā

meñ Dibiyā

meñ kitne ma.ānī kī sub.heñ

vo sub.heñ ki jin par risālat ke dar-band

apnī shuāoñ meñ jakḌī huī

kitnī sahmī huii!

(ye sandūq kyuuñ kar girā?

na jaane kisī ne churāyā?

hamāre hī hāthoñ se phislā?

phisal kar girā?

samundar kī tah meñ magar kab?

hamesha se pahle

hamesha se bhī sāl-hā-sāl pahle?

aur ab tak hai sandūq ke gird

lafzoñ kī rātoñ kā pahrā

vo lafzoñ kī rāteñ

jo devoñ kī mānind

paanī ke las-dar devoñ ke mānind

ye lafzoñ kī rāteñ

samundar kī tah meñ to bastī nahīñ haiñ

magar apne lā-raib pahre kī ḳhātir

vahīñ reñgtī haiñ

shab o roz

sandūq ke chaar sū reñgtī haiñ

samundar kī tah meñ!

bahut sochtā huuñ

kabhī ye ma.ānī kī pākīza sub.hoñ kī pariyāñ

rihā.ī kī ummīd meñ

apne ġhavvās jādū-garoñ kī

sadā.eñ suneñgī?

samundar ki tah mein

samundar ki sangin tah mein

hai sanduq

sanduq mein ek Dibiya mein Dibiya

mein Dibiya

mein kitne maani ki subhen

wo subhen ki jin par risalat ke dar-band

apni shuaon mein jakDi hui

kitni sahmi hui!

(ye sanduq kyun kar gira?

na jaane kisi ne churaya?

hamare hi hathon se phisla?

phisal kar gira?

samundar ki tah mein magar kab?

hamesha se pahle

hamesha se bhi sal-ha-sal pahle?

aur ab tak hai sanduq ke gird

lafzon ki raaton ka pahra

wo lafzon ki raaten

jo dewon ki manind

pani ke las-dar dewon ke manind

ye lafzon ki raaten

samundar ki tah mein to basti nahin hain

magar apne la-raib pahre ki KHatir

wahin rengti hain

shab o roz

sanduq ke chaar su rengti hain

samundar ki tah mein!

bahut sochta hun

kabhi ye maani ki pakiza subhon ki pariyan

rihai ki ummid mein

apne ghawwas jadu-garon ki

sadaen sunengi?