sandal ke daraKHt

kuchh mahakte hue sandal ke daraḳht

gungunāte haiñ

suḳhan-sāz haiñ

afsūñ-gar haiñ

kitne hī mār-e-siyāh

un ke qadmoñ se lipaTne ke liye

bilbilāte haiñ

taḌapte haiñ

machal jaate haiñ

tairte shauq ke dariyāoñ meñ haiñ

Duub jaate haiñ

ubhar aate haiñ

ārzūoñ kī havā kitne bhañvar buntī hai

hosh ke ḳhvāb

tilismoñ kī ghaTā buntī hai

aur sandal ke daraḳht

yūñhī mahke hue ḳhāmosh khaḌe rahte haiñ

aur har samt chalā kartā hai jaadū un kā

sarsarātī hai havā

lahlahā uThtī haiñ shāḳheñ in kī

arġhavānī sī chhiḌak jaatī hai

ḳhvāb kā sā vo salonā manzar

az-ufuq tā-ba-ufuq

kaise suhāne lamhe

har-nafas mauj-e-sharāb

par-e-parvāz taḳhayyul ḳhvābīda

tasavvur bedār

chashm-e-nargis nigarāñ

chashm-e-fusūñ-gar bīmār

kuchh mahakte hue sandal ke daraKHt

gungunate hain

suKHan-saz hain

afsun-gar hain

kitne hi mar-e-siyah

un ke qadmon se lipaTne ke liye

bilbilate hain

taDapte hain

machal jate hain

tairte shauq ke dariyaon mein hain

Dub jate hain

ubhar aate hain

aarzuon ki hawa kitne bhanwar bunti hai

hosh ke KHwab

tilismon ki ghaTa bunti hai

aur sandal ke daraKHt

yunhi mahke hue KHamosh khaDe rahte hain

aur har samt chala karta hai jadu un ka

sarsaraati hai hawa

lahlaha uThti hain shaKHen in ki

arghawani si chhiDak jati hai

KHwab ka sa wo salona manzar

az-ufuq ta-ba-ufuq

kaise suhane lamhe

har-nafas mauj-e-sharab

par-e-parwaz taKHayyul KHwabida

tasawwur bedar

chashm-e-nargis nigaran

chashm-e-fusun-gar bimar