sang-e-mil

vo ek patthar

vo saḳht kaalā siyāh patthar

lahū se tar

jis kī tīrgī naag ban ke Dastī thī

jis kī saḳhtī se kohsāroñ ke dil dahalte the

jis kī ḳhūñ-tishnagī se komal shajar faqat Tahniyoñ kī hasrat ke zāviye the

vo ek patthar

jo tū ne pheñkā

mire samundar meñ harakat-e-lā-zavāl kā ek tāziyāna banā

vo lahreñ uTThīñ

ki ḳhāmosh chāñdnī kī rupahlī chādar bhī thartharā.ī

vo jhaag kā nuur tīrgī ke siyāh pardoñ ko chaak karne lagā

vo shīshe kī ek dīvār

jis ko tū ye samajh rahā thā

ki ek Thokar se chuur hogī

vo ek sone kā thaal ban kar damak rahī hai

wo ek patthar

wo saKHt kala siyah patthar

lahu se tar

jis ki tirgi nag ban ke Dasti thi

jis ki saKHti se kohsaron ke dil dahalte the

jis ki KHun-tishnagi se komal shajar faqat Tahniyon ki hasrat ke zawiye the

wo ek patthar

jo tu ne phenka

mere samundar mein harakat-e-la-zawal ka ek taziyana bana

wo lahren uTThin

ki KHamosh chandni ki rupahli chadar bhi thartharai

wo jhag ka nur tirgi ke siyah pardon ko chaak karne laga

wo shishe ki ek diwar

jis ko tu ye samajh raha tha

ki ek Thokar se chur hogi

wo ek sone ka thaal ban kar damak rahi hai