sarab

maiñ jahāñ thā

vahāñ tīrgī thī ḳhamoshī thī afsurdagī thī

mire kaan naġhmoñ se mahrūm the

siskiyāñ mere hoñToñ kī mīrās thiiñ

merī āñkheñ kisī sail-e-pur-nūr kī muntazir thiiñ

mirī zindagī raakh kā Dher thī

maiñ yahāñ aa gayā

is tarah ḳhuld meñ

us musalsal aziyyat se kāhish se bachne kī ḳhātir

ki jis se faqat ek maiñ hī nahīñ

mere jaise ka.ī aur bhī jāñ-ba-lab the

tirā ḳhuld mere liye

mere jaise ka.ī dūsroñ ke liye

raushnī naġhmagī sarḳhushī kī alāmat thā ye!

maiñ jahāñ huuñ

vahāñ tīrgī hai ḳhamoshī hai afsurdagī hai

mire kaan naġhmoñ se mahrūm haiñ

siskiyāñ mere kānoñ kī mīrās haiñ

merī āñkheñ kisī sail-e-pur-nūr kī muntazir haiñ

merī zindagī raakh kā Dher hai!

main jahan tha

wahan tirgi thi KHamoshi thi afsurdagi thi

mere kan naghmon se mahrum the

siskiyan mere honTon ki miras thin

meri aankhen kisi sail-e-pur-nur ki muntazir thin

meri zindagi rakh ka Dher thi

main yahan aa gaya

is tarah KHuld mein

us musalsal aziyyat se kahish se bachne ki KHatir

ki jis se faqat ek main hi nahin

mere jaise kai aur bhi jaan-ba-lab the

tera KHuld mere liye

mere jaise kai dusron ke liye

raushni naghmagi sarKHushi ki alamat tha ye!

main jahan hun

wahan tirgi hai KHamoshi hai afsurdagi hai

mere kan naghmon se mahrum hain

siskiyan mere kanon ki miras hain

meri aankhen kisi sail-e-pur-nur ki muntazir hain

meri zindagi rakh ka Dher hai!