sasti nazm

kaise mātam karūñ

kaise nauhe likhūñ

kaise rūhoñ kī chīḳhoñ se nazmeñ bunūñ

jāgtī bain kartī havāoñ se

jā kar lipaT jā.ūñ kyā

kirchī kirchī ye ḳhvāboñ ke a.azā jo bikhre paḌe haiñ

unheñ dekh kar phir palaT jā.ūñ kyā

apne aqdār se qaul-o-iqrār se pīchhe haT jā.ūñ kyā

mujh ko iqrār hai

maiñ ne ḳhvāboñ meñ bichhḌe ka.ī ḳhvāb-chehre likhe hī nahīñ

maiñ ne hāthoñ meñ pakḌe kisī haath ke ḳhauf likhe nahīñ

maiñ ne āñkhoñ se bahte lahū-rañg ko laal likkhā nahīñ

maiñ ne ab tak kisī kokh vīrānī kā haal likkhā nahīñ

kyuuñ ye vahshī qalam mere vijdān meñ nazm botā nahīñ

mere ilhām se ye jo lipTā huā ḳhauf kā aks hai kyuuñ ye sotā nahīñ

ab koī hādisa ho bhī jaa.e agar to bhī hotā nahīñ

nazm likkhūñ magar

ab mire shahr meñ nazm likhne pe koī bhī rotā nahīñ

kaise matam karun

kaise nauhe likhun

kaise ruhon ki chiKHon se nazmen bunun

jagti bain karti hawaon se

ja kar lipaT jaun kya

kirchi kirchi ye KHwabon ke aaza jo bikhre paDe hain

unhen dekh kar phir palaT jaun kya

apne aqdar se qaul-o-iqrar se pichhe haT jaun kya

mujh ko iqrar hai

main ne KHwabon mein bichhDe kai KHwab-chehre likhe hi nahin

main ne hathon mein pakDe kisi hath ke KHauf likhe nahin

main ne aankhon se bahte lahu-rang ko lal likkha nahin

main ne ab tak kisi kokh virani ka haal likkha nahin

kyun ye wahshi qalam mere wijdan mein nazm bota nahin

mere ilham se ye jo lipTa hua KHauf ka aks hai kyun ye sota nahin

ab koi hadisa ho bhi jae agar to bhi hota nahin

nazm likkhun magar

ab mere shahr mein nazm likhne pe koi bhi rota nahin