sawal andar sawal

sūraj Duubā kahāñ gayā vo

saarā din ye chāñd kahāñ thā

niiñd meñ Duube band āñkhoñ meñ ḳhvāb kidhar se aate haiñ

bāġhoñ meñ ye rañgoñ ke sailāb kidhar se aate haiñ

bulbul aise pyāre naġhme kis se siikh ke aatī hai

sabza kaise jī uThtā hai titlī kyuuñ mar jaatī hai

lākhoñ Tan ye lohā kaise āsmān meñ uḌtā hai

bijlī kaise jal uThtī hai pañkhā kaise chaltā hai

bādal kaise ban jaate haiñ bārish kaise hotī hai

din hotā hai ek jagah to raat kahīñ pe hotī hai

soch soch ke thak ga.e ham to in bātoñ kā matlab āḳhir

kaun hameñ samjhā.egā

itne saare in rāzoñ se parda kaun uThā.egā

pyāre bachchoñ mat ghabrāo

aur zarā nazdīk aa jaao

baat hamārī ġhaur se sun lo

is nukte ko ḳhuub samajh lo

ilm hī aisā rasta hai jo manzil tak le jā.egā

har mushkil āsān karegā har gutthī suljhā.egā

suraj Duba kahan gaya wo

sara din ye chand kahan tha

nind mein Dube band aankhon mein KHwab kidhar se aate hain

baghon mein ye rangon ke sailab kidhar se aate hain

bulbul aise pyare naghme kis se sikh ke aati hai

sabza kaise ji uThta hai titli kyun mar jati hai

lakhon Tan ye loha kaise aasman mein uDta hai

bijli kaise jal uThti hai pankha kaise chalta hai

baadal kaise ban jate hain barish kaise hoti hai

din hota hai ek jagah to raat kahin pe hoti hai

soch soch ke thak gae hum to in baaton ka matlab aaKHir

kaun hamein samjhaega

itne sare in raazon se parda kaun uThaega

pyare bachchon mat ghabrao

aur zara nazdik aa jao

baat hamari ghaur se sun lo

is nukte ko KHub samajh lo

ilm hi aisa rasta hai jo manzil tak le jaega

har mushkil aasan karega har gutthi suljhaega