sawera

merī sāñsoñ meñ soyā huā āsmāñ jaag uThā

ḳhuuñ kī raftār ko chiir kar gir paḌī raushnī zindagī!

zindagī is zamīñ par

zamīñ par samundar

samundar kā shaffāf paanī ravānī

ravānī kī uñglī pakaḌ kar

ka.ī rañg maujoñ kā āhañg ban kar chale

apne hone kā nairañg ban kar chale

saat pātāl kī kokh hai

phūTī anjān sadiyāñ, yugoñ kī tapassyā

badan ke ghane jañgaloñ meñ

vo rishiyoñ kaa, muniyoñ kā barsoñ kā tap

vo bhūle zamānoñ ke mub.ham kināre

vo mānūs retoñ pe bantī bigaḌtī ka.ī sā.ateñ, ranjisheñ, rāhateñ,

aaj phir se palaT aa.ī haiñ mujh meñ be-sāḳhta!

merī sāñsoñ ke andar chamakte sitāre

utaar ab bujhī raat kī ye qabā

jagmagā ki

lahū meñ havāoñ kā pherā huā

ḳhalā ke dahan meñ saverā huā

mirī ruuh kā rañg terā huā

meri sanson mein soya hua aasman jag uTha

KHun ki raftar ko chir kar gir paDi raushni zindagi!

zindagi is zamin par

zamin par samundar

samundar ka shaffaf pani rawani

rawani ki ungli pakaD kar

kai rang maujon ka aahang ban kar chale

apne hone ka nairang ban kar chale

sat patal ki kokh hai

phuTi anjaan sadiyan, yugon ki tapassya

badan ke ghane jangalon mein

wo rishiyon ka, muniyon ka barson ka tap

wo bhule zamanon ke mubham kinare

wo manus reton pe banti bigaDti kai saaten, ranjishen, rahaten,

aaj phir se palaT aai hain mujh mein be-saKHta!

meri sanson ke andar chamakte sitare

utar ab bujhi raat ki ye qaba

jagmaga ki

lahu mein hawaon ka phera hua

KHala ke dahan mein sawera hua

meri ruh ka rang tera hua