sayyaron ki mahfil

zamīn

mirī nazroñ meñ ai mirrīḳh terā darja a.alā hai

bulandī par tū rahtā hai tirī qismat bhī baalā hai

mirrīḳh

bulandī aur pastī kā kabhī dhokā nahīñ khā.eñ

zamīñ uupar dikhā.ī de agar mirrīḳh par aa.eñ

zamīn

tujhe maanā hai devtā jañg kā nādān logoñ ne

tabāhī kā diyā ilzām tujh ko rome vāloñ ne

tujhe bhārat ke dānish-var sadā manhūs kahte haiñ

tujhe kahte rahe mañgal kabhī jallād kahte haiñ

batā ai surḳh sayyāre tire hālāt kaise haiñ

tire tālāb kaise haiñ tire bāġhāt kaise haiñ

tire pākīza dāman meñ manāzir kaise kaise haiñ

tirī āġhosh ke andar navādir kaise kaise haiñ

mirrīḳh

nahīñ mirrīḳh par jhīleñ na chashma hī ubaltā hai

samundar hai na dariyā hai na koī motī miltā hai

na bulbul ke tarāne haiñ na koī gul mahaktā hai

parinda bhī nahīñ koī ḳhushī se jo chahaktā hai

yahāñ jugnū nahīñ koī jo zulmat meñ chamaktā hai

na hiirā aur nīlam hai hamesha jo damaktā hai

havā kā koī jhoñkā hai na sabza lahlahātā hai

na battaḳhoñ kī qatāreñ haiñ na taa.ir chachahātā hai

nasīm-e-sub.h chaltī hai na bādal aur paanī hai

na gulshan hai yahāñ koī na maujoñ kī ravānī hai

mire qutbain ko dekho vahāñ yaḳh-basta paanī hai

yahī paanī yahāñ par zindagānī kī nishānī hai

zamīñ ke log kahte haiñ ki nahroñ kī ravānī hai

haqīqat meñ nahīñ aisā faqat jhūTī kahānī hai

yahāñ sūrat nazar aatī hai ābshāroñ kī

nazar aatī hai kasrat har taraf sañglāḳh ġhāroñ kī

yahāñ hai gahrā sannāTā ḳhamoshī kī hukūmat hai

fazā bhī ḳhushk hai merī nahīñ koī ratūbat hai

zamīn

sharīk-e-bazm ho mister atārid tum bhī kuchh bolo

zabāñ par lag gayā taalā to is mahfil meñ tum kholo

atārad

paḌosī huuñ maiñ sūraj kā namūna huuñ jahannum kā

yahāñ shiddat kī garmī hai to mumkin hī nahīñ jiinā

zamīn

mire nazdīk ho zohra bahut raḳhshanda sayyāra

yahāñ sab log kahte haiñ ki tum ho sub.h kā taara

zohra

munavvar merā chehra hai maiñ garmī kā maarā huuñ

zamīñ hai mujh ko pyārī maiñ zamīñ vāloñ kā pyārā huuñ

zamīn

azīmushshān jussa hai hamārī mantarī tum ho

jise zebā hai sardārī vo be-shak mushtarī tum ho

mushtarī

baḌā hai jism merā aur zīnat kuchh nahīñ mujh meñ

baḌā sā gol-gappā huuñ sabāhat kuchh nahīñ mujh meñ

zamīn

hamārī anjuman meñ ai zuhal tum hī nirāle ho

tumhāre gird halqa hai anokhī shakl vaale ho

zuhal

gale meñ tauq hai mere mirī sūrat nirālī hai

agar nazdīk se dekheñ to ye shai tez āñdhī hai

nazar aatā hai jo halqa vo haiñ chhoTe baḌe patthar

lagāte haiñ baḌī ta.adād meñ chāroñ taraf chakkar

zamīn

mire do bhaa.ī haiñ aage tumhārā haal kaisā hai

vahāñ hai kaifiyat kaisī vahāñ māhaul kaisā hai

uranus

yahāñ shiddat kī sardī hai lihāzā maiñ bhī ThanDā huuñ

zarā merī taraf dekho baḌā sā golā ganDā huuñ

neptune

mujhe neptune kahte haiñ usī kumbe kā huuñ member

bahut duurī hai sūraj se lagātā huuñ baḌā chakkar

mirrīḳh

maiñ pahuñchā is natīje par zamīñ par ḳhush-numā.ī hai

ḳhudā ne phuul aur paudoñ se ye duniyā sajā.ī hai

zamīñ par zindagī hai husn hai aur dilrubā.ī hai

mujhe ulfat zamīñ se hai vahī dil meñ samā.ī hai

vahāñ ābād haiñ insāñ vahāñ shān-e-ḳhudā.ī hai

hamārī kahkashāñ meñ aisī qismat kis ne paa.ī hai

zamin

meri nazron mein ai mirriKH tera darja aala hai

bulandi par tu rahta hai teri qismat bhi baala hai

mirriKH

bulandi aur pasti ka kabhi dhoka nahin khaen

zamin upar dikhai de agar mirriKH par aaen

zamin

tujhe mana hai dewta jang ka nadan logon ne

tabahi ka diya ilzam tujh ko rome walon ne

tujhe bhaarat ke danish-war sada manhus kahte hain

tujhe kahte rahe mangal kabhi jallad kahte hain

bata ai surKH sayyare tere haalat kaise hain

tere talab kaise hain tere baghat kaise hain

tere pakiza daman mein manazir kaise kaise hain

teri aaghosh ke andar nawadir kaise kaise hain

mirriKH

nahin mirriKH par jhilen na chashma hi ubalta hai

samundar hai na dariya hai na koi moti milta hai

na bulbul ke tarane hain na koi gul mahakta hai

parinda bhi nahin koi KHushi se jo chahakta hai

yahan jugnu nahin koi jo zulmat mein chamakta hai

na hira aur nilam hai hamesha jo damakta hai

hawa ka koi jhonka hai na sabza lahlahata hai

na battaKHon ki qataren hain na tair chachahata hai

nasim-e-subh chalti hai na baadal aur pani hai

na gulshan hai yahan koi na maujon ki rawani hai

mere qutbain ko dekho wahan yaKH-basta pani hai

yahi pani yahan par zindagani ki nishani hai

zamin ke log kahte hain ki nahron ki rawani hai

haqiqat mein nahin aisa faqat jhuTi kahani hai

yahan surat nazar aati hai aabshaaron ki

nazar aati hai kasrat har taraf sanglaKH ghaaron ki

yahan hai gahra sannaTa KHamoshi ki hukumat hai

faza bhi KHushk hai meri nahin koi ratubat hai

zamin

sharik-e-bazm ho mister atarid tum bhi kuchh bolo

zaban par lag gaya tala to is mahfil mein tum kholo

atarad

paDosi hun main suraj ka namuna hun jahannum ka

yahan shiddat ki garmi hai to mumkin hi nahin jina

zamin

mere nazdik ho zohra bahut raKHshanda sayyara

yahan sab log kahte hain ki tum ho subh ka tara

zohra

munawwar mera chehra hai main garmi ka mara hun

zamin hai mujh ko pyari main zamin walon ka pyara hun

zamin

azimushshan jussa hai hamari mantari tum ho

jise zeba hai sardari wo be-shak mushtari tum ho

mushtari

baDa hai jism mera aur zinat kuchh nahin mujh mein

baDa sa gol-gappa hun sabahat kuchh nahin mujh mein

zamin

hamari anjuman mein ai zuhal tum hi nirale ho

tumhaare gird halqa hai anokhi shakl wale ho

zuhal

gale mein tauq hai mere meri surat nirali hai

agar nazdik se dekhen to ye shai tez aandhi hai

nazar aata hai jo halqa wo hain chhoTe baDe patthar

lagate hain baDi tadad mein chaaron taraf chakkar

zamin

mere do bhai hain aage tumhaara haal kaisa hai

wahan hai kaifiyat kaisi wahan mahaul kaisa hai

uranus

yahan shiddat ki sardi hai lihaza main bhi ThanDa hun

zara meri taraf dekho baDa sa gola ganDa hun

neptune

mujhe neptune kahte hain usi kumbe ka hun member

bahut duri hai suraj se lagata hun baDa chakkar

mirriKH

main pahuncha is natije par zamin par KHush-numai hai

KHuda ne phul aur paudon se ye duniya sajai hai

zamin par zindagi hai husn hai aur dilrubai hai

mujhe ulfat zamin se hai wahi dil mein samai hai

wahan aabaad hain insan wahan shan-e-KHudai hai

hamari kahkashan mein aisi qismat kis ne pai hai