shaer

jhūThe shā.er ye ġhaur se sun leñ

shā.irī sab ke bas kī baat nahīñ

ye vo ilhām hai ke jis ke liye

rab hī chuntā hai apne bandoñ meñ

aise bandoñ ko jin ke siine meñ

dard hotā hai saare aalam kā

jo mohabbat kī baat karte haiñ

jo uḳhuvvat kī baat karte haiñ

jo sadāqat kī baat karte haiñ

zulm ke sāmne khaḌe ho kar

jo baġhāvat kī baat karte haiñ

muflisoñ aur ġham ke māroñ kī

jo himāyat kī baat karte haiñ

nā-ummīdī ke ghup añdheroñ meñ

jo diye aas ke jalāte haiñ

buġhz rakhte nahīñ jo siine meñ

dushmanoñ ko gale lagāte haiñ

saare aalam meñ amn kī ḳhātir

rāt-din ḳhūn-e-dil jalāte haiñ

jin ko shohrat kī aas hotī nahīñ

jin ko daulat kī aas hotī nahīñ

shān-o-shaukat kī aas hotī nahīñ

jo qalandar kī tarah jiite haiñ

jo faqīroñ kī tarah rah kar bhī

bādshāhoñ kī tarah jiite haiñ

jhūThe shā.er ye ġhaur se sun leñ

shā.ir-e-be-navā ke siine par

sher utarte haiñ āyatoñ kī tarah

jhuThe shaer ye ghaur se sun len

shairi sab ke bas ki baat nahin

ye wo ilham hai ke jis ke liye

rab hi chunta hai apne bandon mein

aise bandon ko jin ke sine mein

dard hota hai sare aalam ka

jo mohabbat ki baat karte hain

jo uKHuwwat ki baat karte hain

jo sadaqat ki baat karte hain

zulm ke samne khaDe ho kar

jo baghawat ki baat karte hain

muflison aur gham ke maron ki

jo himayat ki baat karte hain

na-ummidi ke ghup andheron mein

jo diye aas ke jalate hain

bughz rakhte nahin jo sine mein

dushmanon ko gale lagate hain

sare aalam mein amn ki KHatir

raat-din KHun-e-dil jalate hain

jin ko shohrat ki aas hoti nahin

jin ko daulat ki aas hoti nahin

shan-o-shaukat ki aas hoti nahin

jo qalandar ki tarah jite hain

jo faqiron ki tarah rah kar bhi

baadshahon ki tarah jite hain

jhuThe shaer ye ghaur se sun len

shair-e-be-nawa ke sine par

sher utarte hain aayaton ki tarah