shaeri mat karo

kāñToñ ke taaj chuno

yā

jab sach kī raah chalo

lafzoñ ke pech-o-tāb meñ ullū na bano

shā.erī mat karo!

moTe-jhoTe yajmānoñ kī jhiḌkiyāñ hoñ

yā kāhil riyā-kār afsaroñ kā phaTkāreñ

yā phir

dublī-patlī diq-zada bīviyoñ ke ta.ane hoñ

yā totā-chashm ayyār rut badlī

mahbūbāoñ kī jhūTī muskurāhaTeñ

ḳhāmosh raho

har shai ko

qudarat kā karishma samjho

par ḳhudā ke liye

bhagvān ke liye

shaitān ke liye

shā.erī mat karo

manzar pas-manzar

ḳhāmosh hotā hai

peḌ sākit khaḌe rahte haiñ

patte hilte haiñ

par na uḌte haiñ

kahīñ duur se rail kī sīTiyāñ ubhartī haiñ

aur nazdīk ke race-kors se

bhāgte tezābī ghoḌoñ kī Tāpoñ se ziyāda

nau-dolatiye gadhoñ kī chīḳh-o-pukār se

kaan phaTne lagte haiñ

har kahīñ kānoñ ko

ruuī mayassar nahīñ aatī hai

kam-az-kam

āñkheñ muuñd lo

(ye tumhāre bas meñ hai)

añdhiyāre meñ āvāzeñ zaa.il ho jā.eñgī

zehn ke kaale parde par

koī tasvīr nahīñ ubhregī

kānoñ meñ

koī āvāz nahīñ aa.egī

gūñge bahre andhe ho jaao

shā.erī mat karo

aur añdhiyāre meñ duur talak dekhte jaao

der talak

be-sub.h-o-shām

be-jism-o-jān

ākāsh āsmān

dekhte jaao

shāyad isī lamhe

yā kal parsoñ

yā sadiyāñ guzar jaane ke ba.ad

zamīn uḌ jaane

āsmān bikhar jaane ke ba.ad

har shai ke mar jaane ke ba.ad

dhuul simaT jā.egī

dhund miTegī

añdhiyāre meñ chāroñ jānib

ā.īna ubhregā

kānoñ meñ nuqra.ī ghanTiyoñ ke maddham naġhmoñ

kī sharāboñ kā nashsha gūñjegā

chāroñ samt sunahrī safed motī

sā chamaktā chehrā ubhregā

chāroñ jānib sar-sugandh kī mālā.eñ

lahrā.eñgī

nit-navelī sadā kī doshīza

shā.erī kī pālkī par savār aa.egī

mujh ko

duur bides le jā.egī

kanTon ke taj chuno

ya

jab sach ki rah chalo

lafzon ke pech-o-tab mein ullu na bano

shaeri mat karo!

moTe-jhoTe yajmanon ki jhiDkiyan hon

ya kahil riya-kar afsaron ka phaTkaren

ya phir

dubli-patli diq-zada biwiyon ke tane hon

ya tota-chashm ayyar rut badli

mahbubaon ki jhuTi muskurahaTen

KHamosh raho

har shai ko

qudarat ka karishma samjho

par KHuda ke liye

bhagwan ke liye

shaitan ke liye

shaeri mat karo

manzar pas-manzar

KHamosh hota hai

peD sakit khaDe rahte hain

patte hilte hain

par na uDte hain

kahin dur se rail ki siTiyan ubharti hain

aur nazdik ke race-kors se

bhagte tezabi ghoDon ki Tapon se ziyaada

nau-dolatiye gadhon ki chiKH-o-pukar se

kan phaTne lagte hain

har kahin kanon ko

rui mayassar nahin aati hai

kam-az-kam

aankhen mund lo

(ye tumhaare bas mein hai)

andhiyare mein aawazen zail ho jaengi

zehn ke kale parde par

koi taswir nahin ubhregi

kanon mein

koi aawaz nahin aaegi

gunge bahre andhe ho jao

shaeri mat karo

aur andhiyare mein dur talak dekhte jao

der talak

be-subh-o-sham

be-jism-o-jaan

aakash aasman

dekhte jao

shayad isi lamhe

ya kal parson

ya sadiyan guzar jaane ke baad

zamin uD jaane

aasman bikhar jaane ke baad

har shai ke mar jaane ke baad

dhul simaT jaegi

dhund miTegi

andhiyare mein chaaron jaanib

aaina ubhrega

kanon mein nuqrai ghanTiyon ke maddham naghmon

ki sharabon ka nashsha gunjega

chaaron samt sunahri safed moti

sa chamakta chehra ubhrega

chaaron jaanib sar-sugandh ki malaen

lahraengi

nit-naweli sada ki doshiza

shaeri ki palki par sawar aaegi

mujh ko

dur bides le jaegi