shah-e-wala

ham to yuuñ bhī bāj-guzār the sadiyoñ ke

ham to kitnī hī nasloñ se

aap kī kitnī hī nasloñ ko

haqq-e-namak meñ

apne īmān aur anā kā

nazrāna dete aa.e the

ham ne to apne hisse meñ

mahal-sarā ke pichhvāḌe kī

dhuul chunī thī

aur rāhoñ meñ uḌne vaale kuchh tinke bhī

jin se ghoñsle ban sakte the

mahal-sarā ko in tinkoñ se kyā ḳhatra thā

phir kyuuñ aap ne shāh-e-vālā

chīloñ kavvoñ aur gidhoñ ko

chhoTe chhoTe ghoñsle nochne par māmūr kiyā hai

aisā kyuuñ hai shāh-e-vālā

ham sadiyoñ ke bāj-guzār to

shahr-e-panāh se bāhar haiñ

lekin chīleñ kavve aur gidh

shahr-e-panāh ke andar haiñ

shahr-e-panāh kī is taqsīm meñ

kis kā haath hai shāh-e-vālā

hum to yun bhi baj-guzar the sadiyon ke

hum to kitni hi naslon se

aap ki kitni hi naslon ko

haqq-e-namak mein

apne iman aur ana ka

nazrana dete aae the

hum ne to apne hisse mein

mahal-sara ke pichhwaDe ki

dhul chuni thi

aur rahon mein uDne wale kuchh tinke bhi

jin se ghonsle ban sakte the

mahal-sara ko in tinkon se kya KHatra tha

phir kyun aap ne shah-e-wala

chilon kawwon aur gidhon ko

chhoTe chhoTe ghonsle nochne par mamur kiya hai

aisa kyun hai shah-e-wala

hum sadiyon ke baj-guzar to

shahr-e-panah se bahar hain

lekin chilen kawwe aur gidh

shahr-e-panah ke andar hain

shahr-e-panah ki is taqsim mein

kis ka hath hai shah-e-wala