shair-e-mashriq ki arz-dasht

allāma-iqbāl ke huzūr

fitrat kā kārobār to chaltā hai aaj bhī

mahtāb barg-e-gul pe phisaltā hai aaj bhī

qudrat ne ham ko daulat-e-duniyā bhī kam na dī

sayyāl zar-e-zamīñ se ubaltā hai aaj bhī

duniyā meñ raushnī bhī hamāre hī dam se hai

mashriq se āftāb nikaltā hai aaj bhī

par manzar-e-ġhurūb bahut dil-nashīñ hai kyuuñ

maġhrib kī shaam apnī sahar se hasīñ hai kyuuñ

is kashmakash meñ daulat-e-uqbā bhī chhin ga.ī

zauq-e-junūñ se vus.at-e-sahrā bhī chhin ga.ī

sahrā-e-ārzū meñ tag-o-dau nahīñ rahī

pā-e-talab se vādī-e-sīnā bhī chhin ga.ī

tū ne to qartaba meñ namāzeñ bhī kiiñ adā

apnī jabīñ se masjid-e-aqsā bhī chhin ga.ī

kohsār rauñd Daale ga.e khet ho ga.e

chaTTān ham zarūr the ab ret ho ga.e

manzil pe aa ke luT ga.e ham rahbaroñ ke saath

bīmār bhī paḌe haiñ to chāragaroñ ke saath

ġhurbat-kade meñ kaash utar aa.e kahkashāñ

āñkheñ falak kī samt haiñ bojhal saroñ ke saath

uḌnā muhāl lauT ke aanā bhī hai vabāl

zaḳhmī duā ḳhalā meñ hai TuuTe paroñ ke saath

is razm-e-ḳhair-o-shar meñ huā kaun suraḳh-rū

zarb-e-kalīm kund hai fir.aun surḳh-rū

allama-iqbaal ke huzur

fitrat ka karobar to chalta hai aaj bhi

mahtab barg-e-gul pe phisalta hai aaj bhi

qudrat ne hum ko daulat-e-duniya bhi kam na di

sayyal zar-e-zamin se ubalta hai aaj bhi

duniya mein raushni bhi hamare hi dam se hai

mashriq se aaftab nikalta hai aaj bhi

par manzar-e-ghurub bahut dil-nashin hai kyun

maghrib ki sham apni sahar se hasin hai kyun

is kashmakash mein daulat-e-uqba bhi chhin gai

zauq-e-junun se wusat-e-sahra bhi chhin gai

sahra-e-arzu mein tag-o-dau nahin rahi

pa-e-talab se wadi-e-sina bhi chhin gai

tu ne to qartaba mein namazen bhi kin ada

apni jabin se masjid-e-aqsa bhi chhin gai

kohsar raund Dale gae khet ho gae

chaTTan hum zarur the ab ret ho gae

manzil pe aa ke luT gae hum rahbaron ke sath

bimar bhi paDe hain to chaaragaron ke sath

ghurbat-kade mein kash utar aae kahkashan

aankhen falak ki samt hain bojhal saron ke sath

uDna muhaal lauT ke aana bhi hai wabaal

zaKHmi dua KHala mein hai TuTe paron ke sath

is razm-e-KHair-o-shar mein hua kaun suraKH-ru

zarb-e-kalim kund hai firaun surKH-ru