shair

ik mukammal zindagī hai shā.ir-e-shīrīñ-bayāñ

mahram-e-rāz-e-fanā hai aur baqā kā tarjumāñ

us kī hastī kī hai qīmat ik nigāh-e-iltifāt

hech ḳhuddārī ke aage haiñ zamīn-o-āsmāñ

vo kahīñ majbūr-e-mutlaq hai kahīñ muḳhtār-e-kul

husn kā be-dām banda varna hai shāh-e-jahāñ

ḳham jabīñ hotī hai us kī naqsh-e-pā-e-dost par

aur jhuk jaate haiñ us ke paañv par donoñ jahāñ

us se poshīda nahīñ haiñ rāz-hā-e-husn-o-ishq

tarjumāñ hai ahl-e-ulfat kā vo sirr-e-dil-barāñ

phuul barsātā hai apne dostoñ kī bazm meñ

aur girātā hai saf-e-aġhyār par ye bijliyāñ

us ke nāzuk qalb meñ miltā hai mazlūmoñ kā dard

be-kasoñ kā hai vo haamī be-zabānoñ kī zabāñ

fitratan āzād be-ḳhauf-o-ḳhatar bebāk hai

zindagī detī haiñ us ko zindagī kī talḳhiyāñ

dil ke tūfāñ meñ qalam us kā hai kashtī nuuh kī

aur hai us kā tasavvur ek bahr-e-be-karāñ

qalb us kā mulk ke hālāt kā ā.īna-dār

qaum ke jazbāt kī tash.hīr hai us kā bayāñ

diin hai us kā mohabbat us kī duniyā shā.erī

hai tashaddud kā muḳhālif hāmi-e-amn-o-amāñ

ai 'shifā' un ko magar shā.ir na kah denā kahīñ

bazm meñ lā kar jo paḌhte haiñ kalām-e-dīgarāñ

ek mukammal zindagi hai shair-e-shirin-bayan

mahram-e-raaz-e-fana hai aur baqa ka tarjuman

us ki hasti ki hai qimat ek nigah-e-iltifat

hech KHuddari ke aage hain zamin-o-asman

wo kahin majbur-e-mutlaq hai kahin muKHtar-e-kul

husn ka be-dam banda warna hai shah-e-jahan

KHam jabin hoti hai us ki naqsh-e-pa-e-dost par

aur jhuk jate hain us ke panw par donon jahan

us se poshida nahin hain raaz-ha-e-husn-o-ishq

tarjuman hai ahl-e-ulfat ka wo sirr-e-dil-baran

phul barsata hai apne doston ki bazm mein

aur giraata hai saf-e-aghyar par ye bijliyan

us ke nazuk qalb mein milta hai mazlumon ka dard

be-kason ka hai wo hami be-zabanon ki zaban

fitratan aazad be-KHauf-o-KHatar bebak hai

zindagi deti hain us ko zindagi ki talKHiyan

dil ke tufan mein qalam us ka hai kashti nuh ki

aur hai us ka tasawwur ek bahr-e-be-karan

qalb us ka mulk ke haalat ka aaina-dar

qaum ke jazbaat ki tashhir hai us ka bayan

din hai us ka mohabbat us ki duniya shaeri

hai tashaddud ka muKHalif hami-e-amn-o-aman

ai 'shifa' un ko magar shair na kah dena kahin

bazm mein la kar jo paDhte hain kalam-e-digaran