shair

na jaane kitne hī maazī ke ḳhvāb bikhre haiñ

fasurda bhīgī huī sogvār palkoñ par

junūñ hai yā ki ḳhirad is nigāh kā mafhūm

ḳhalā meñ DhūñD rahā hai koī na jaane kyā

nigāh dekh rahī haiñ pare zamāne se

hai khoyā khoyā huā ramz-e-zindagī goyā

fasāna-e-ġham-e-jānāñ hai yā ġham-e-duniyā

machal rahe haiñ in āñkhoñ meñ aarzū ke sharār

in āñsuoñ meñ numāyāñ haiñ vaqt kī lahreñ

sunā.ī detī hai rah rah ke zindagī kī pukār

laboñ ko gar milī jumbish to naġhma phuuT paḌā

kabhī nashāt kā jaadū kabhī koī ġham hai

ḳhamoshiyoñ meñ hai īmān-o-āgahī kī jilā

umīd-o-bīm se aage nayā hī aalam hai

sahar kā nuur hai us kī nigāh meñ 'anjum'

zamīñ ke husn ko shādāb karne aayā hai

na jaane kitne hi mazi ke KHwab bikhre hain

fasurda bhigi hui sogwar palkon par

junun hai ya ki KHirad is nigah ka mafhum

KHala mein DhunD raha hai koi na jaane kya

nigah dekh rahi hain pare zamane se

hai khoya khoya hua ramz-e-zindagi goya

fasana-e-gham-e-jaanan hai ya gham-e-duniya

machal rahe hain in aankhon mein aarzu ke sharar

in aansuon mein numayan hain waqt ki lahren

sunai deti hai rah rah ke zindagi ki pukar

labon ko gar mili jumbish to naghma phuT paDa

kabhi nashat ka jadu kabhi koi gham hai

KHamoshiyon mein hai iman-o-agahi ki jila

umid-o-bim se aage naya hi aalam hai

sahar ka nur hai us ki nigah mein 'anjum'

zamin ke husn ko shadab karne aaya hai