sham ka pahla tara (2)

merī us shaam ke taare se mulāqāt bahut gahrī thī

vo mirā ham-dam-e-derīna thā

maiñ bahut chhoTī thī jab maañ ne batāyā thā mujhe

''dekho dekho vo udhar vo mirī uñglī ke qarīb

ek taarā bhī tumheñ dekhtā hai''

un dinoñ jab maiñ havāoñ kī tarah uḌtī thī

aur Daalī kī tarah jhuum ke lahrātī thī

raat aur din ke lipaTne kī ghaḌī aate hī

sirf us taare kī ḳhātir maiñ Thahar jaatī thī

vo mujhe dekhtā thā

maiñ bhī use dekhtī thī

vo mujhe DhūñDhtā thā

maiñ bhī use DhūñDhtī thī

aur us īd-e-mulāqāt ke ba.ad

roz ham donoñ bichhaḌ jaate the

apnī manzil kī taraf vo bhī chalā jaatā thā

apne rastoñ kī taraf meñ bhī palaT aatī thī

merī us shaam ke taare se mulāqāt bahut gahrī thī

maiñ ne taare kī rifāqat meñ shagun kitne liye

aaj dekhā nahīñ taarā maiñ ne

aaj kī shaam jo roz aatā hai shāyad nahīñ aa.e

rāsta bhuul na jaa.e

aaj to jald nikal aayā hai taarā merā

aaj kī raat mulāqāt milegī mujh ko

an-kahe lafzoñ kī sauġhāt milegī mujh ko

maiñ ne taare kī rifāqat meñ shagun kitne liye

ab maiñ tanhā huuñ

baras biit ga.e haiñ kitne

koī taarā nahīñ dekhā maiñ ne

duur kī chiiz zarā dhundlī nazar aatī hai

merī ḳhvābīda samā.at ko jagāne ke liye

sirf āvāz-e-azāñ aatī hai

ab shagun kaahe se luuñ

kis ke aane kī umīdeñ bāñdhūñ

kis ke jaane se pareshān rahūñ

kal magar phone kī ghanTī ne mujhe

apne māhaul se bedār kiyā

zindagī se mujhe do-chār kiyā

ek amrit bharā lahja mire kānoñ meñ ghulā

''ammāñ kal shaam dikhāyā ham ne

apne bachchoñ ko chamaktā tārā''

''kaun sā taarā dikhāyā tum ne''

''aap kā shaam kā pahlā tārā''

phone jab ḳhatm huā

vaqt dinoñ hī gale milte the

maiñ ne khiḌkī se haTāyā parda

āsmāñ hadd-e-nazar tak varaq-e-sāda thā

na shafaq thī na ufuq par hī koī taarā thā

yak-ba-yak ek kiran chehre par lahrāne lagī

duur kī chiiz zarā dhundlī nazar aatī hai

merā taarā merī palkoñ par utar aayā thā

maiñ ne uñglī ke sahāre se use thaam liyā

apne āñchal meñ use bāñdh liyā

bhalā is umr meñ ye saath kise miltā hai

merī us shaam ke taare se mulāqāt bahut gahrī thī

.....mirā hamdam-e-derīna thā

meri us sham ke tare se mulaqat bahut gahri thi

wo mera ham-dam-e-derina tha

main bahut chhoTi thi jab man ne bataya tha mujhe

dekho dekho wo udhar wo meri ungli ke qarib

ek tara bhi tumhein dekhta hai

un dinon jab main hawaon ki tarah uDti thi

aur Dali ki tarah jhum ke lahraati thi

raat aur din ke lipaTne ki ghaDi aate hi

sirf us tare ki KHatir main Thahar jati thi

wo mujhe dekhta tha

main bhi use dekhti thi

wo mujhe DhunDhta tha

main bhi use DhunDhti thi

aur us id-e-mulaqat ke baad

roz hum donon bichhaD jate the

apni manzil ki taraf wo bhi chala jata tha

apne raston ki taraf mein bhi palaT aati thi

meri us sham ke tare se mulaqat bahut gahri thi

main ne tare ki rifaqat mein shagun kitne liye

aaj dekha nahin tara main ne

aaj ki sham jo roz aata hai shayad nahin aae

rasta bhul na jae

aaj to jald nikal aaya hai tara mera

aaj ki raat mulaqat milegi mujh ko

an-kahe lafzon ki saughat milegi mujh ko

main ne tare ki rifaqat mein shagun kitne liye

ab main tanha hun

baras bit gae hain kitne

koi tara nahin dekha main ne

dur ki chiz zara dhundli nazar aati hai

meri KHwabida samaat ko jagane ke liye

sirf aawaz-e-azan aati hai

ab shagun kahe se lun

kis ke aane ki umiden bandhun

kis ke jaane se pareshan rahun

kal magar phone ki ghanTi ne mujhe

apne mahaul se bedar kiya

zindagi se mujhe do-chaar kiya

ek amrit bhara lahja mere kanon mein ghula

amman kal sham dikhaya hum ne

apne bachchon ko chamakta tara

kaun sa tara dikhaya tum ne

aap ka sham ka pahla tara

phone jab KHatm hua

waqt dinon hi gale milte the

main ne khiDki se haTaya parda

aasman hadd-e-nazar tak waraq-e-sada tha

na shafaq thi na ufuq par hi koi tara tha

yak-ba-yak ek kiran chehre par lahrane lagi

dur ki chiz zara dhundli nazar aati hai

mera tara meri palkon par utar aaya tha

main ne ungli ke sahaare se use tham liya

apne aanchal mein use bandh liya

bhala is umr mein ye sath kise milta hai

meri us sham ke tare se mulaqat bahut gahri thi

mera hamdam-e-derina tha