sham-o-sahar

kyā mausam-e-gul hai ki yahāñ phuul nahīñ

kāñTe dar-o-dīvār kī zīnat dar-o-dīvār pe raqsāñ

har gul kī mahak tere mire ḳhuuñ kī mahak hai

insān ke ranjīda dil-o-jāñ kī kasak hai

har shāḳh kī mehrāb pe haiñ ḳhuun ke chhīñTe

pyāse ḳhas-o-ḳhāshāk taḌapte haiñ shab-o-roz

shabnam kī ziyā-bār damaktī huī paa.el

ojhal hai nigah se

koyal kī koī kuuk na raushan koī naġhma

har kūcha-e-ehsās meñ golī kī azaañ hai

bam aslaha aur bārūd ke chole pahan kar

ham sar-phire tahzīb-o-tamaddun ke liye

haiñ gasht meñ aise

jaise ki ye bam aur bārūd

hoñ sab hī masā.il kā hal

jaise hoñ yahī azmat-e-insāñ ke muhāfiz

jaise ki mire amn-o-amāñ

ho in ke karam par

jaise ki mire bāġh-e-bahārāñ kī hifāzat

ho in kī ināyat

jaise ki hasīñ phūloñ kī ismat ke liye

ab mausam-e-gul meñ bhī

golī bam aur bandūq

ho ne.amat

kya mausam-e-gul hai ki yahan phul nahin

kanTe dar-o-diwar ki zinat dar-o-diwar pe raqsan

har gul ki mahak tere mere KHun ki mahak hai

insan ke ranjida dil-o-jaan ki kasak hai

har shaKH ki mehrab pe hain KHun ke chhinTe

pyase KHas-o-KHashak taDapte hain shab-o-roz

shabnam ki ziya-bar damakti hui pael

ojhal hai nigah se

koyal ki koi kuk na raushan koi naghma

har kucha-e-ehsas mein goli ki azan hai

bam aslaha aur barud ke chole pahan kar

hum sar-phire tahzib-o-tamaddun ke liye

hain gasht mein aise

jaise ki ye bam aur barud

hon sab hi masail ka hal

jaise hon yahi azmat-e-insan ke muhafiz

jaise ki mere amn-o-aman

ho in ke karam par

jaise ki mere bagh-e-bahaaran ki hifazat

ho in ki inayat

jaise ki hasin phulon ki ismat ke liye

ab mausam-e-gul mein bhi

goli bam aur banduq

ho neamat