shabab-e-gurezan
mai-e-tāza-o-nāb hāsil nahīñ hai
to kar lūñgā durd-e-tah-e-jām pī kar guzārā!
mujhe ek nau-ras kalī ne
ye ta.ana diyā thaa:
tirī umr kā ye taqāzā hai
tū aise phūloñ kā bhoñrā bane
jin meñ do chaar din kī mahak rah ga.ī ho
ye sach hai vo tasvīr
jis ke sabhī rañg dhundlā ga.e hoñ
na.e rañg us meñ bhare kaun lā kar
na.e rañg laa.e kahāñ se?
tire āsmāñ kaa,
maiñ ik taaza vārid sitārā sahī
jāntā huuñ ki, is āsmāñ par
bahut chāñd, sūraj, sitāre ubhar kar
jo ik baar Duube to ubhre nahīñ haiñ
farāmosh-gārī ke niile ufuq se,
unhī kī tarah maiñ bhī
nā-tajarba-kār insāñ kī himmat se aage baḌhā huuñ,
jo aage baḌhā huuñ,
to dil meñ havas ye nahīñ hai
ki ab se hazāroñ baras ba.ad kī dāstānoñ meñ
zinda ho ik baar phir naam merā!
ye shām-e-dil-āvez to ik bahāna hai,
ik koshish-e-nā-tavāñ hai
shabāb-e-gurezāñ ko jaate hue rokne kī
vagarna hai kaafī mujhe ek pal kā sahārā,
huuñ ik taaza vārid, musībat kā maarā
maiñ kar lūñgā durd-e-tah-e-jām pī kar guzārā!
mai-e-taza-o-nab hasil nahin hai
to kar lunga durd-e-tah-e-jam pi kar guzara!
mujhe ek nau-ras kali ne
ye tana diya tha:
teri umr ka ye taqaza hai
tu aise phulon ka bhonra bane
jin mein do chaar din ki mahak rah gai ho
ye sach hai wo taswir
jis ke sabhi rang dhundla gae hon
nae rang us mein bhare kaun la kar
nae rang lae kahan se?
tere aasman ka,
main ek taza warid sitara sahi
jaanta hun ki, is aasman par
bahut chand, suraj, sitare ubhar kar
jo ek bar Dube to ubhre nahin hain
faramosh-gari ke nile ufuq se,
unhi ki tarah main bhi
na-tajarba-kar insan ki himmat se aage baDha hun,
jo aage baDha hun,
to dil mein hawas ye nahin hai
ki ab se hazaron baras baad ki dastanon mein
zinda ho ek bar phir nam mera!
ye sham-e-dil-awez to ek bahana hai,
ek koshish-e-na-tawan hai
shabab-e-gurezan ko jate hue rokne ki
wagarna hai kafi mujhe ek pal ka sahaara,
hun ek taza warid, musibat ka mara
main kar lunga durd-e-tah-e-jam pi kar guzara!
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.