shafaq

ye shafaq pighle hue sone kī goyā kaan hai

jis taraf dekho sunahre rang kā tūfān hai

arsh se tā-farsh chhā.ī hai gulābī raushnī

uf chhiḌak dī kis ne aalam par sharāb-e-zindagī

ho rahī haiñ safha-e-ālam par rang-āmeziyāñ

ban gayā saarā jahān-e-sāda ik rangīñ jahāñ

jā rahā hai qāfila rangīniyoñ nūroñ kā ye

bah rahā hai yā safīna charḳh par hūroñ kā ye

ye sunahrī kaun bastī hai nahīñ chaltā patā

kah rahā hai dil jazīra to nahīñ ye ḳhuld kā

husn mastī-zā kuchh aisā chhā rahā hai dahr par

dil se maiñ huuñ be-ḳhabar to dil hai mujh se be-ḳhabar

ḳhuld kā zarrīñ samundar maujzan hai charḳh par

yā javāhar kā zaḳhīra aa rahā hai ye nazar

jis taraf dekho zamīñ tā-āsmāñ hai surḳh-posh

ik zamīn-o-āsmāñ kyā kul jahāñ hai surḳh-posh

ye tahayyur-zā nazāre ye suhānī rangateñ

kyā utar aa.ī haiñ gardūñ se zamīñ par jannateñ

kaash is dilchasp-tar duniyā meñ kho jaa.e 'shamīm'

kaash in rangīniyoñ meñ jazb ho jaa.e 'shamīm'

ye shafaq pighle hue sone ki goya kan hai

jis taraf dekho sunahre rang ka tufan hai

arsh se ta-farsh chhai hai gulabi raushni

uf chhiDak di kis ne aalam par sharab-e-zindagi

ho rahi hain safha-e-alam par rang-ameziyan

ban gaya sara jahan-e-sada ek rangin jahan

ja raha hai qafila ranginiyon nuron ka ye

bah raha hai ya safina charKH par huron ka ye

ye sunahri kaun basti hai nahin chalta pata

kah raha hai dil jazira to nahin ye KHuld ka

husn masti-za kuchh aisa chha raha hai dahr par

dil se main hun be-KHabar to dil hai mujh se be-KHabar

KHuld ka zarrin samundar maujzan hai charKH par

ya jawahar ka zaKHira aa raha hai ye nazar

jis taraf dekho zamin ta-asman hai surKH-posh

ek zamin-o-asman kya kul jahan hai surKH-posh

ye tahayyur-za nazare ye suhani rangaten

kya utar aai hain gardun se zamin par jannaten

kash is dilchasp-tar duniya mein kho jae 'shamim'

kash in ranginiyon mein jazb ho jae 'shamim'