shaffafiyan

hameñ tum muskurāhaT do

tumheñ ham khilkhilāte roz o shab deñge

ye kaise ho

ki tum bauchhaḌ do

to ham tumheñ jal-thal na de deñ

aur sahrāoñ ko farsh-e-āb na kar deñ

hamārā dhyān rakho tum

tumheñ duniyā meñ rakheñge ham apnī ārzuoñ kī

ye kaise ho

ki tum sochā karo

aur ham tumhārī soch ko tajsīm na kar deñ

muravvaj chāhatoñ ke

be-lachak aa.iin meñ tarmīm na kar deñ

tumheñ ye bhī batāte haiñ

agar koī ḳhalish hai yā koī ib.hām hai dil meñ

to phir aage nahīñ baḌhnā

ki ham shaffāf haiñ

shaffāfiyāñ hī chāhte haiñ

be-nazar shīshoñ meñ apne aks ko mailā nahīñ karte

tumheñ ye bhī batāte haiñ

agar tum chhab dikhā ke chhup ga.e

to ham tumheñ DhūñDeñge chāhe aap kho jaa.eñ

agar tum kahkashāñ maskan banāoge

to ham bhī raushnī-zāde haiñ

sūraj ke pujārī haiñ

ham aise sab sitāre toḌ dete haiñ

jo ham se raushnī kī bhiik bhī lete haiñ

āñkhoñ meñ bhī chubhte haiñ

agar pātāl meñ chhupne kī koshish kī

to phir ai sīm-tan!

dhartī hamāre vāste sonā ugaltī hai

bhalā chāñdī kahāñ is meñ Thahartī hai

hamārī raah meñ

shīsha-numā paanī kī jhīleñ mat bichhānā tum

ye kañkar pheñk kar hī faisla hogā

ki us pahnā.ī meñ kashtī utartī hai

yā phir ham paañv dharte haiñ

magar aisā na karnā tum

ki ham aisā hī karte haiñ

hamein tum muskurahaT do

tumhein hum khilkhilate roz o shab denge

ye kaise ho

ki tum bauchhaD do

to hum tumhein jal-thal na de den

aur sahraon ko farsh-e-ab na kar den

hamara dhyan rakho tum

tumhein duniya mein rakhenge hum apni aarzuon ki

ye kaise ho

ki tum socha karo

aur hum tumhaari soch ko tajsim na kar den

murawwaj chahaton ke

be-lachak aain mein tarmim na kar den

tumhein ye bhi batate hain

agar koi KHalish hai ya koi ibham hai dil mein

to phir aage nahin baDhna

ki hum shaffaf hain

shaffafiyan hi chahte hain

be-nazar shishon mein apne aks ko maila nahin karte

tumhein ye bhi batate hain

agar tum chhab dikha ke chhup gae

to hum tumhein DhunDenge chahe aap kho jaen

agar tum kahkashan maskan banaoge

to hum bhi raushni-zade hain

suraj ke pujari hain

hum aise sab sitare toD dete hain

jo hum se raushni ki bhik bhi lete hain

aankhon mein bhi chubhte hain

agar patal mein chhupne ki koshish ki

to phir ai sim-tan!

dharti hamare waste sona ugalti hai

bhala chandi kahan is mein Thaharti hai

hamari rah mein

shisha-numa pani ki jhilen mat bichhana tum

ye kankar phenk kar hi faisla hoga

ki us pahnai mein kashti utarti hai

ya phir hum panw dharte hain

magar aisa na karna tum

ki hum aisa hi karte hain