shahar-zade

is daur ke haiñ qissa-go

ham shahr-zādoñ kī suno

ye dāstān-e-zīst hai

kuchh ḳhvāb kī ta.abīr hai

kuchh dard kī tamsīl hai

ā.indagāñ kā shahr yā hai raftagāñ kī aarzū

ik gahmā-gahmī kū-ba-kū phailī huī hai chār-sū

ījād-dar-ījād hotī ḳhvāhisheñ aur justujū

har samt meñ baḌhtā huā ye kār-zār-e-rañg-o-bū

āsā.ishoñ ke is ghane jañgal meñ tanhā maiñ ki tū

ham mash.al-e-āshufta lau

ham shahr-zādoñ kī suno

aur āsmāñ se bāteñ kartīñ un fasīloñ kā ye jaal

is jaal meñ mahbūs hotī roz-o-shab ye zindagī

is zindagī se munqalib hotī huī vāraftagī

har aan hai koī ḳhalish har pal ki jaise tishnagī

har haal meñ phir bhī muqaddam kāvish-e-āsūdgī

ham āsmāñ ke rāh-rau

ham shahr-zādoñ kī suno

is kūcha-o-bāzār meñ ajnās ke ambār haiñ

fitrat se kosoñ duur haiñ ye jo bhī kārobār haiñ

is dauḌ meñ sab log hī paiham subuk-raftār haiñ

apnī mashīnī zindagī ham aadmī bezār haiñ

lekin hamāre hausle is daur ke me.amār haiñ

ham se milī tāroñ ko zau

ham shahr-zādoñ kī suno

hai ḳhud-farāmoshī pe ġhālib ḳhud-farebī kī chubhan

takrār se ta.abīr haiñ ye zindagī ke māh-o-san

yaksāniyat ke dasht meñ khultā hai nudrat kā chaman

māyūs jazboñ se idhar kuchh kar dikhāne kī lagan

bīm-o-rajā ke darmiyāñ ham shahr-zāde haiñ magan

ham shahr-zādoñ kī suno

ham rāqim-e-tārīḳh-e-nau

is daur ke hain qissa-go

hum shahr-zadon ki suno

ye dastan-e-zist hai

kuchh KHwab ki tabir hai

kuchh dard ki tamsil hai

aaindagan ka shahr ya hai raftagan ki aarzu

ek gahma-gahmi ku-ba-ku phaili hui hai chaar-su

ijad-dar-ijad hoti KHwahishen aur justuju

har samt mein baDhta hua ye kar-zar-e-rang-o-bu

aasaishon ke is ghane jangal mein tanha main ki tu

hum mashal-e-ashufta lau

hum shahr-zadon ki suno

aur aasman se baaten kartin un fasilon ka ye jal

is jal mein mahbus hoti roz-o-shab ye zindagi

is zindagi se munqalib hoti hui waraftagi

har aan hai koi KHalish har pal ki jaise tishnagi

har haal mein phir bhi muqaddam kawish-e-asudgi

hum aasman ke rah-rau

hum shahr-zadon ki suno

is kucha-o-bazar mein ajnas ke ambar hain

fitrat se koson dur hain ye jo bhi karobar hain

is dauD mein sab log hi paiham subuk-raftar hain

apni mashini zindagi hum aadmi bezar hain

lekin hamare hausle is daur ke meamar hain

hum se mili taron ko zau

hum shahr-zadon ki suno

hai KHud-faramoshi pe ghaalib KHud-farebi ki chubhan

takrar se tabir hain ye zindagi ke mah-o-san

yaksaniyat ke dasht mein khulta hai nudrat ka chaman

mayus jazbon se idhar kuchh kar dikhane ki lagan

bim-o-raja ke darmiyan hum shahr-zade hain magan

hum shahr-zadon ki suno

hum raqim-e-tariKH-e-nau