shahidon ko salam

saarī musībatoñ ko jo hañs hañs ke sah ga.e

dār-e-fanā meñ sirf vahī zinda rah ga.e

vo josh thā ki phāñd ga.e kohsār bhī

vo azm thā ki uTThe to tā-mehr-o-mah ga.e

sīnoñ meñ sabr-o-zabt kī vo tez aag thī

zulm-o-sitam ke koh-e-girāñ gal ke bah ga.e

tārīkiyoñ ko matla-e-anvār kah ga.e

zulm-o-sitam ko tāla-e-bedār kah ga.e

tā-umr yuuñ to mohr-ba-lab hī rahe magar

afsāna-e-bulandī-e-kirdār kah ga.e

aa.ī koī balā to lagāyā use gale

TuuTā koī sitam to use pyaar kah ga.e

kaḌkī kamāñ to us ko kiyā naġhma-e-hayāt

ḳhanjar kabhī chubhā to use ḳhaar kah ga.e

roke ga.e to aur baḌhī quvvat-e-amal

zaḳhmī hue to jism ko gulnār kah ga.e

tauq-o-rasan ko naam diyā zulf dost kā

zindāñ ko sāya-e-mizha-e-yār kah ga.e

husn-e-hayāt ke vo adā-āshnā ki jo

har qatl-gah ko misr kā bāzār kah ga.e

kis ān-bān ke vo shahīdān-e-qaum the

jo teġh ko bhī abrū-e-ḳhamdār kah ga.e

yādash-ba-ḳhair ḳhāk-e-vatan terī god meñ

kyā log the jo daar ko dildār kah ga.e

sari musibaton ko jo hans hans ke sah gae

dar-e-fana mein sirf wahi zinda rah gae

wo josh tha ki phand gae kohsar bhi

wo azm tha ki uTThe to ta-mehr-o-mah gae

sinon mein sabr-o-zabt ki wo tez aag thi

zulm-o-sitam ke koh-e-giran gal ke bah gae

tarikiyon ko matla-e-anwar kah gae

zulm-o-sitam ko tala-e-bedar kah gae

ta-umr yun to mohr-ba-lab hi rahe magar

afsana-e-bulandi-e-kirdar kah gae

aai koi bala to lagaya use gale

TuTa koi sitam to use pyar kah gae

kaDki kaman to us ko kiya naghma-e-hayat

KHanjar kabhi chubha to use KHar kah gae

roke gae to aur baDhi quwwat-e-amal

zaKHmi hue to jism ko gulnar kah gae

tauq-o-rasan ko nam diya zulf dost ka

zindan ko saya-e-mizha-e-yar kah gae

husn-e-hayat ke wo ada-ashna ki jo

har qatl-gah ko misr ka bazar kah gae

kis aan-ban ke wo shahidan-e-qaum the

jo tegh ko bhi abru-e-KHamdar kah gae

yaadash-ba-KHair KHak-e-watan teri god mein

kya log the jo dar ko dildar kah gae