shahr-e-ana mein

ye tez dhuup ye kāñdhoñ pe jāgtā sūraj

zamīñ buland hai utnī ki āsmāñ kī raqīb

vo raushnī hai vo bedāriyāñ ki saa.e na ḳhvāb

bas ek hosh bas ik āgahī bas ik ehsās

aur un ke nuur se jalte badan pighalte badan

badan haiñ khaulte sayyāl ā.īne har sū

har aan bahte sadā hai.ateñ badalte badan

dimāġh duur se un kā nazāra kartā hai

aur un ke qurb ke iz.hār se sañvartā hai

vo raushnī hai ki az-fard-tā-ba-fard tamām

kisī kī shakl na sūrat kisī kā rañg na ruup

tamām anfus-o-āfāq gum haiñ aapas meñ

haiñ fard fard kī parchhā.iyāñ bhī dhuup hī dhuup

sab apne ilm kā jādū-e-sāmrī le kar

hazār āñkhoñ se ik dūsre ko dekhte haiñ

ravāñ-davāñ haiñ sab ik dūsre ko dekhte haiñ

aur itnā jaan chuke haiñ sab ek dūsre ko

kuchh itnī duur nikal aa.e haiñ sab apne se

ki dil ke rishtoñ ko ab māntā nahīñ koī

kisī ko apne sivā jāntā nahīñ koī

ye tez dhup ye kandhon pe jagta suraj

zamin buland hai utni ki aasman ki raqib

wo raushni hai wo bedariyan ki sae na KHwab

bas ek hosh bas ek aagahi bas ek ehsas

aur un ke nur se jalte badan pighalte badan

badan hain khaulte sayyal aaine har su

har aan bahte sada haiaten badalte badan

dimagh dur se un ka nazara karta hai

aur un ke qurb ke izhaar se sanwarta hai

wo raushni hai ki az-fard-ta-ba-fard tamam

kisi ki shakl na surat kisi ka rang na rup

tamam anfus-o-afaq gum hain aapas mein

hain fard fard ki parchhaiyan bhi dhup hi dhup

sab apne ilm ka jadu-e-samri le kar

hazar aankhon se ek dusre ko dekhte hain

rawan-dawan hain sab ek dusre ko dekhte hain

aur itna jaan chuke hain sab ek dusre ko

kuchh itni dur nikal aae hain sab apne se

ki dil ke rishton ko ab manta nahin koi

kisi ko apne siwa jaanta nahin koi