shahr-e-nawa

us gird-o-navāh meñ mahkī thī

vo naġhma ba-lab laale kī kalī

pattī par lipTī pattī sarkātī

āhista ḳhirām sunahrī dhūpoñ meñ

ik puurī rut kā ḳham us ke

amrit se bharā

ik puurī rut DanDī Dhalkāne

pañkhuḌiyāñ bikhrāne ko darkār huī

sab chaman chaman gul hauz labālab saa.e ghane

jhoñkoñ kī sūrat kī ravāñ-davāñ

uftāda ba-zāhir sab rāheñ

rahtī haiñ paiham sargardāñ

sab agle pichhle yug

sab baste ujaḌte gaañv nagar

sharnāthī nirvāsī

paiham dohrāte hue

vo biitī bāteñ

jin kā koī ant nahīñ

pīḌhī pīḌhī kālakh piitī

in rāhoñ par

chalte chalte talve pathrā jaate haiñ

pathrāhaT

dhīre dhīre hastī kā zāhir bātin sab letī hai nigal

āñkheñ sākit

aañsū jym jaate haiñ

jab koī na ho

jab saaya shāḳh-e-gul af.ī ban kar reñge

har aahaT ke nādīda haath meñ chāqū kā phal khulā huā

rah rah kar chamak uThe

tab kaun hai ye

shāne par narmī se rakhā jaane vaalā

ik haath kahīñ ye

ḳhusrav kā naġhma to nahīñ

ik pal sanjog zamānoñ kā

jānoñ kā aur armānoñ kā

jharnā ban kar patthar se phuuT paḌā

ye apnī āñkheñ

kitne dūr-darāz zamānoñ meñ

khul saktī haiñ

paanī is chhāñv kā ThanDā yaḳh

paanī meñ basī kuuza kī sugandh

marham zaḳhm-e-jigar kā

aur kaarī itnā

ye apnī āñkheñ kitne dūr-darāz

zamānoñ meñ khul saktī haiñ

sab kuchh vaisā hī jaise sach-much kā

zī-nafas kushāda gird-o-pesh

ta.amīr ujlī ujlī

jādoñ meñ

har aan ujāgar ojhal arz-o-samā

is gird-o-navāh meñ utrā thā

ik shahr-e-navā

vo ek samay kā diip samay kī āñdhī meñ

jaltā thā yahāñ

is meñ jitnā bhī shāmil thā

mahloñ kā fasīloñ kā hissa

nābūd huā

nābūd huā jaatā hai paiham

qatl-e-ām kā ḳhat

lashkar gāhoñ kā raqba

qarnoñ kā asāsa

pūrab kā āhañg ye jaanā pahchānā

ik narm tamāzat basant-rut meñ

rachī huī

jab jab maiñ laalī kahtī huuñ

ik sūraj zer-e-ḳhatt-e-ufuq

mahjūb huā jaatā hai jaise ik aalam

ho us kī taraf añgusht-numā

tham jaate haiñ pal bhar ko navā-gar safar-nasīb

ye kis sāgar kī parvarda badlī hogī

kitnī jaañ levā masāfateñ tai kar ke use

is vaadī ke dāman meñ milā

hañgām barasne kā

us gird-o-nawah mein mahki thi

wo naghma ba-lab lale ki kali

patti par lipTi patti sarkati

aahista KHiram sunahri dhupon mein

ek puri rut ka KHam us ke

amrit se bhara

ek puri rut DanDi Dhalkane

pankhuDiyan bikhrane ko darkar hui

sab chaman chaman gul hauz labaalab sae ghane

jhonkon ki surat ki rawan-dawan

uftada ba-zahir sab rahen

rahti hain paiham sargardan

sab agle pichhle yug

sab baste ujaDte ganw nagar

sharnathi nirwasi

paiham dohraate hue

wo biti baaten

jin ka koi ant nahin

piDhi piDhi kalakh piti

in rahon par

chalte chalte talwe pathra jate hain

pathrahaT

dhire dhire hasti ka zahir baatin sab leti hai nigal

aankhen sakit

aansu jym jate hain

jab koi na ho

jab saya shaKH-e-gul afi ban kar renge

har aahaT ke nadida hath mein chaqu ka phal khula hua

rah rah kar chamak uThe

tab kaun hai ye

shane par narmi se rakha jaane wala

ek hath kahin ye

KHusraw ka naghma to nahin

ek pal sanjog zamanon ka

jaanon ka aur armanon ka

jharna ban kar patthar se phuT paDa

ye apni aankhen

kitne dur-daraaz zamanon mein

khul sakti hain

pani is chhanw ka ThanDa yaKH

pani mein basi kuza ki sugandh

marham zaKHm-e-jigar ka

aur kari itna

ye apni aankhen kitne dur-daraaz

zamanon mein khul sakti hain

sab kuchh waisa hi jaise sach-much ka

zi-nafas kushada gird-o-pesh

tamir ujli ujli

jadon mein

har aan ujagar ojhal arz-o-sama

is gird-o-nawah mein utra tha

ek shahr-e-nawa

wo ek samay ka dip samay ki aandhi mein

jalta tha yahan

is mein jitna bhi shamil tha

mahlon ka fasilon ka hissa

nabud hua

nabud hua jata hai paiham

qatl-e-am ka KHat

lashkar gahon ka raqba

qarnon ka asasa

purab ka aahang ye jaana pahchana

ek narm tamazat basant-rut mein

rachi hui

jab jab main lali kahti hun

ek suraj zer-e-KHatt-e-ufuq

mahjub hua jata hai jaise ek aalam

ho us ki taraf angusht-numa

tham jate hain pal bhar ko nawa-gar safar-nasib

ye kis sagar ki parwarda badli hogi

kitni jaan lewa masafaten tai kar ke use

is wadi ke daman mein mila

hangam barasne ka