shahr se bahar nikalte raste

sochtā huuñ maiñ

tumhāre zer-e-lab harf-e-suḳhan meñ

koī afsāna hai muzmar yā haqīqat yā fareb-e-puḳhta-kārāñ

maiñ nazar rakhtā huuñ tum par

aur tumhārī aañkh hai paiham ta.āqub meñ kisī ik ajnabī ke

ajnabī jo ḳhud hirāsāñ aur pareshāñ-hāl hai

dūsrī jānib saḌak par der se ik aur shaḳhs

jhuuT ko sach kah ke jo elaan kartā phir rahā hai

dil hī dil meñ Dar rahā hai

uḌte jaate haiñ sabhī chehroñ ke rañg

gaThriyāñ apnī sameTe

shahr se bāhar nikalte rāstoñ par har koī hai gāmzan

is be-e'tibārī āgahī ke darmiyāñ

ik asā-bardār kuchh kahtā huā

jis kā ik ik lafz paivasta hai

yuuñ ik dūsre se

jis tarah nazdīk tar aate hue qadmoñ kī chaap

sochta hun main

tumhaare zer-e-lab harf-e-suKHan mein

koi afsana hai muzmar ya haqiqat ya fareb-e-puKHta-karan

main nazar rakhta hun tum par

aur tumhaari aankh hai paiham taaqub mein kisi ek ajnabi ke

ajnabi jo KHud hirasan aur pareshan-haal hai

dusri jaanib saDak par der se ek aur shaKHs

jhuT ko sach kah ke jo elan karta phir raha hai

dil hi dil mein Dar raha hai

uDte jate hain sabhi chehron ke rang

gaThriyan apni sameTe

shahr se bahar nikalte raston par har koi hai gamzan

is be-e'tibari aagahi ke darmiyan

ek asa-bardar kuchh kahta hua

jis ka ek ek lafz paiwasta hai

yun ek dusre se

jis tarah nazdik tar aate hue qadmon ki chap